Айсен Николаев: “Өлүөхүмэ сотору кэминэн биир бырамыысыланнай оройуон буолуоҕа”
Ил Дархан Айсен Николаев бүгүн Өлүөхүмэ улууһун социальнай-экэнэмиичэскэй сайдыытыгар мунньах ыытта. Мунньахха Айсен Сергеевич улуус бырамыысыланнаһын сайыннарыыга улахан кэскиллээҕин эттэ.
Өлүөхүмэҕэ билигин көмүһү таһынан гиипсэ хостонор. Ону сэргэ ньиэп, гаас, тимир, о.д.а. сиртэн хостонор баайы чинчийии үлэтэ бара турар. Ил Дархан иһитиннэрбитинэн, Өлүөхүмэ кэнэҕэскитин сиртэн хостонор баайынан бырамыысыланнаһынан эмиэ инники күөҥҥэ сылдьар улуус буолуохтаах.
– Өлүөхүмэ улууһа бырамыысыланнаһын сайыннарыытынан эмиэ инники күөҥҥэ тахсыахтаах. Манна сиртэн хостонор баай үгүс. Улууска ону хостооһун, туһаҕа таһаарыы саҥа баран эрэр. Билиҥҥиттэн тулалыыр эйгэни, айылҕаны, аҕыйах ахсааннаах хотугу омуктар олорор сирдэрин харыстааһыҥҥа туһааннаах үлэлэр бары барыахтаахтар, – диэн бэлиэтиир Ил Дархан мунньах кэмигэр.
Айсен Николаев мунньах түмүгүнэн улуус социальнай-экэнэмиичэскэй сайдыытын стратегиятыгар уларыыталары киллэрэргэ эттэ. Санатан эттэххэ, бу стратегия 2018 сыллаахха ылыныллыбыта. Билигин Өлүөхүмэҕэ “Роснефть”, “Газпром” улахан хампаанньалар кэлэн үлэлээн эрэллэр. Айсен Сергеевич бу хампаанньалары кытары улуус салалтата ыкса үлэлэһэригэр сүбэлээтэ.
Аграфена КУЗЬМИНА