Айсен Николаев Өлүөхүмэ куорат төрүттэммитэ 385 сылынан, Өлүөхүмэ улууһа 90 сылынан эҕэрдэлиир
Убаастабыллаах Өлүөхүмэ олохтоохторо!
Саха Өрөспүүбүлүкэтин салалтатын уонна тус бэйэм ааппыттан Өлүөхүмэ куорат төрүттэммитэ 385, Өлүөхүмэ улууһа тэриллибитэ 90 сылларынан эҕэрдэлиибин!
Өҥ буордаах Өлүөхүмэ сирэ-уота былыр-былыргыттан тайаан сытар кырасыабай айылҕатынан, кэрэ көстүүлээх кытылларынан, хойуу сыалаах мастарынан уонна күндү түүлээҕинэн биллэр. Манна Арассыыйа хотугулуу-илин өттүгэр бастакынан сири оҥоруу уонна бурдугу үүннэрии култуурата саҕаламмыта.
Түөрт үйэ анараа өттүгэр Енисей хаһаактара олохтообут остуруоктара сүүһүнэн сыллар тухары устуоруйаҕа чаҕылхайдык суруллар. Өлүөхүмэ куорат сыыйа транспортнай логистика киинигэр кубулуйар, манна буочта трага ааһар, борохуот сырыыта олохтонор. Былыргы куорат устуоруйатыгар дьоһун суолтаны, быйыл үбүлүөйдээх сылга 150 сылын туолар Спасскай таҥара дьиэтэ ылар. Бүгүн устуоруйаҕа суолтаны чөлүгэр түһэрии, улуус духуобунай сайдыытыгар эргиир саҥа саҕалааһынынан буолар.
1930 сыллаахха Өлүөхүмэ саҥа тэриллибит оройуон административнай киининэн буолбута. Доруобуйа харыстабылын уонна култуура тэрилтэлэрэ аһыллыбыттара, оскуолалар уонна оҕо саадтара тутуллубуттара. Өрөспүүбүлүкэҕэ тыа хаһайыстыбатын каадырдарын бэлэмниир тиэхиньикум тэриллибитэ. Биллэр уларыйыылар кэннилэриттэн Өлүөхүмэ, өрөспүүбүлүкэ бөдөҥ административнай территориятынан буолбута.
Күн бүгүн Өлүөхүмэ улууһа Саха сиригэр тыа хаһаайыстыбата уонна бырамыысыланнас тэтимнээхтик сайдар киининэн буолар. Манна улахан инвестиционнай бырайыактар олоххо киирэллэр, социальнай эбийиэктэр тутуллаллар, нэһилиэктэри тупсарыы барар. Эһиги, өлүөхүмэлэр, 385 сылгытыгар “Мин уулуссам күнэ” (“День улицы моей”) диэн саҥа үгэһи олохтоотугут. Манан эһиги ааспыт кэм устуоруйатыгар харыстабыллаахтык сыһыаннаһаргытын, биллиилээх биир дойдулаахтаргыт туһунан өйдөбүлү үйэтитэргитин көрдөрөҕүт. Ыччат улууһун ситиһиититтэн киэн туттуон сөп. Биһиги хотугу кыраайбыт социальнай-экэнэмиическэй сайдыытыгар кылааттарын киллэрсибит туруу үлэһиттэри уонна улуус уопсастыбанньыктарын бэлиэтээн ааһар суолталаах. Өҥ буордаах дойдуларын туһугар күүстэрин харыстаабакка айбыт-туппут, үлэлээбит күндү бэтэрээннэрбитигэр махталбыт улахан.
Бэлиэ түгэннэр быйыл Улуу Кыайыы 75 сылыгар сөп түбэстилэр. 6 тыһыынчаттан тахса Өлүөхүмэ олохтооҕо дойдутун көмүскээбитэ, үгүстэр кыргыһыы хонуутуттан төннүбэтэхтэрэ. Снайпер Иван Кульбертиновынан бүтүн Саха сирэ киэн туттар. Быйыл саха бастакы лүөччүгэ Вера Захарова уонна Сэбиэскэй Сойуус Дьоруойа Григорий Зорин төрөөбүттэрэ 100 сылын туолла. 125 сыл анараа өттүгэр үс сэрии кыттыылааҕа, Аҕа дойду Улуу сэриитин кэмигэр өстөөхтөр Москваҕа чугаһаан кэлиилэригэр дивизияны хамаандалаабыт генерал-майор Леонид Котельников Өлүөхүмэ сиригэр төрөөбүтэ.
Эһиэхэ, Өлүөхүмэ улууһа — үгүс көлүөнэни уонна араас дьылҕалаах дьону сомоҕолуур, үйэлэр тухары эйэ дэмнээхтик үлэлээн-хамсаан, айан-тутан элбэх норуот биир санаанан түмсэн олорор уопсай дьиэҕит. Төрөөбүт сиргитигэр тапталгыт, күүскүт, дьулуургут инникитин даҕаны улуус сайдарын туһугар көмөлөстүн.
Күндү улуус олохтоохторо! Бүгүҥҥү бырааһынньыктааҕы күнүнэн истиҥник эҕэрдэлиибин, дьолу, тапталы уонна үтүө туруктаныыны баҕарабын. Хас биирдиигитэр кытаанах доруобуйаны, Саха сирин уонна модун Арассыыйа туһугар бары соруккутун олоххо киллэриҥ!
СӨ Ил Дархана А.С. Николаев.