Ил Дархан Айсен Николаев бүгүн, атырдьах ыйын 22 күнүгэр, кыстыкка бэлэмнэниигэ мунньах ыытта. Мунньахха халаан уутугар эмсэҕэлээбит Дьааҥы улууһугар ордук болҕомтотун уурда.
Санатан эттэххэ, быйыл халаан ууутугар Дьааҥы улууһун нэһилиэнньэлээх пууннара уонна Кэбээйи Сэбээн Күөлэ улаханнык эмсэҕэлээбиттэрэ. Манна сыһыаран Айсен Сергеевич дьоҥҥо-сэргэҕэ туһааннаах көмөлөр ыйыллыбыт болдьохторугар оҥоһуллуохтаахтарын, социальнай эбийиэктэр бары кыстыкка бэлэм буолуохтаахтарын өссө биирдэ санатан эттэ. Улахан болҕомто сүөһү аһын бэлэмнээһиҥҥэ барыахтаах. Дьааҥы улууһугар оту тиэйии уустугунан сибээстээн, миэстэтигэр уонна атын улуустарга мобильнай биригээдэлэри тэрийэн оту бэлэмнээһин барыахтаах этэ. Ил Дархан биригээдэлэр үлэлэрин хонтуруоллуурга, тиэхиньикэлэри элбэтэн биэрэргэ сорудахтаата.
Ону таһынан кини өрөспүүбүлүкэ үрдүнэн оскуолалар тутууларын ураты болҕомтоҕо ыларга, суолу-ииһи оҥоруу, өрөмүөннээһин былаан быһыытынан барыта ыйыллыбыт болдьохторугар түмүктэниэхтээхтэрин эттэ.
Мунньахха Айсен Николаев РФ бырабыыталыстыбатын бэрэссэдээтэлэ Михаил Мишустин Саха сиригэр үлэлээн барыытын түмүгүн иһитиннэрдэ. Ол курдук, Михаил Владимирович бу сырыытын кэнниттэн айан идэлэри сайыннарыыга улахан былааны бигэргэппитэ. Бу предпринимательствоны, олохтоох оҥорон таһаарыыны сайыннарыыга туһуламмыт докумуон буолар. Ону сэргэ РФ бырабыыталыстыбатын быһаарыытынан, Уһук Илин эрэгийиэннэргэ сынньана кэлбит киһи путевкатыттан 40 тыһыынча солкуобайга диэри төннөрөр кыахтаммыта. Ити Уһук Илин эрэгийиэннэргэ туризмы сайыннарыыга биир эмиэ баттаамалаах докумуон буолар.
Тыа сиригэр чэпчэтиилээх ипотеканы биэрии болдьоҕо суох буолла. Ол эбэтэр бу өҥөнөн хаһан баҕарар туһаныахха сөп. Тиэхиньикэ уматыгын бензинтэн гааска көһөрүүнү субсидиялааһын 48 бырыһыаҥҥа тэҥнэстэ. Ону таһынан тыа хаһаайыстыбатын бородууксуйатын оҥорон таһаарааччыларга кирэдьиит уон бырыһыантан биэскэ диэри түстэ. Манна даҕатан эттэххэ, бу чэпчэтиллибит кирэдьиитинэн саҥа быраабыланан тыа хаһаайыстыбатын бородууксуйатын таһар тэрилтэлэр эмиэ туһаныахтарын сөп.
Аграфена КУЗЬМИНА