Айсен Николаев: «Кыһын буолуор диэри Дьокуускай ыраас буолара наада»

Бэҕэһээ, балаҕан ыйын 26 күнүгэр, СӨ Ил Дархана Айсен Николаев «Дьокуускай куорат» уокуругун тупсарарга былааны таһынан мунньаҕы ыытта. Ил Дархан мунньах бары кыттыылаахтарын Дьокуускайы ыраастыырга субуотунньукка  ыҥырда. Уокуруктааҕы дьаһалта уонна куорат управатын салалталара өрүс пордун сирин-уотун ыраастаатылар. Өрөспүүбүлүкэ салалтатыттан бэрэстэбиитэллэр уонна пресса үлэһиттэрэ Айсен Николаев салалтатынан Птицефабрика түөлбэтигэр субуотунньуктаатылар.

Айсен Николаев этэринэн, Дьокуускайга улахан эбийиэктэр тутуллубуттарын, уулуссаларга өрөмүөннэр ыытыллыбыттарын да иһин, куорат олохтоохторо өрөспүүбүлүкэ киинэ кирдээҕин, бөх-сах ыһылларын ыйаллар. «Ити өйдөнөр. Тоҕо диэтэххэ, дьон дьиэлэриттэн кирдээх, ыһыллыбыт тиэргэҥҥэ тахсаллар. Айылҕаҕа таҕыстахпытына, онно-манна бөх тоҕуллан, быраҕыллан сытарын көрөбүт. Бу боппуруоһу куорат салалтата куруук быһаарыахтаах. Кыһын буолуор диэри бөх-сах хомуллара, куорат ырааһырара, өрө тардыллара  наада», — диэтэ эрэгийиэн салайаачыта.

Кини балачча  элбэх бөх ыһылла сытарын бэлиэтээн эттэ. «Бу кэтээн көрөр органнар, үрдүкү салалта, куорат дьаһалтата бу боппуруоһу хонтуруолга тута сылдьыахтаахтарын өйдөтөр. Биллэн турар, куорат олохтоохторо бэйэлэрэ эмиэ бөҕү-саҕы хаалларыа суохтаахтар», — диэтэ кини.

Айсен Николаев Экология министиэристибэтигэр, айылҕа харыстабылын куораттааҕы кэмитиэтигэр Птицефабрика оройуонун болҕомтоҕо ылыахтаахтарын бэлиэтээтэ. Ил Дархан тулалыыр эйгэни харыстааһын дьон-сэргэ доруобуйатыгар суолталааҕын, ситимнээҕин ыйда уонна бары тулалыыр эйгэлэригэр харыстабыллаахтык сыһыаннаһалларыгар ыҥырда.