Айсен Николаев: “Култуура уонна ускуустуба Арктикатааҕы киинэ тутуллуохтаах”
Бу туһунан Ил Дархан өрөспүүбүлүкэ суруналыыстарын кытта көрсүһүүгэ иһитиннэрдэ. Тутуу Саха сирин култураата салгыы сайдарыгар сүдү суолталааҕын бэлиэтээтэ.
«Билиҥҥи кэмҥэ биһиги култуурабыт сайдыы саҥа кэрдииһигэр кэлэн турар. Салгыы биһиги быһаарыныахтаахпыт – аан дойду култууратыгар бэйэбит суолбутун-ииспитин хаалларабыт, чулууларын кытта тэҥҥэ күрэстэһэр кыахтанабыт, ааппытын ааттатабыт, киһи кыбыстыбакка көрдөрөр тупсаҕай көстүүлээх култуура кииннэнэбит дуу, биитэр атыттартан туох да уратыта суох куораттар ахсааннарыгар киирсэбит дуу?
Тоҕо биһиги Муусука үрдүкү оскуолатын, Олоҥхо тыйаатырын, филармонияны, араас култуура үөрэҕин тэрилтэлэрин үбүлээн үлэлэтэ олоробутуй? Оччоҕо балартан аккаастаныаххайыҥ ээ…
Маннык кииннэр Владивостокка, Кемероваҕа, Калининградка, Севастопольга тутулла сылдьаллар. Итилэр биһиги былаанныыр кииммитин кытта тэҥнэр, ол гынан баран, сыаналара быдан ыарахан. Барыта Саха сирин суотугар тутуллуо суоҕа, дойду өттүттэн үбүлээһини туруорсуохпут.
Онон Култуура уонна ускуустуба Арктикатааҕы киинэ тутуллуохтаах. Биллэн туран, бу бырайыак бары өттүттэн дьүүллэһиллиэхтээх. Тутуу, архитектура үөрэхтээхтэрин, тыйаатыр, филармония айар үлэһиттэрин, олохтоох дьону кытта көрсүһэн, бары өрүттэрин ырытыы хайаан да барыахтаах. Биһиги кэпсэтиигэ бэлэммит уонна аһаҕаспыт”.