Кулун тутар 16-17 күннэригэр Дьокуускайга көҥүл тустууга аан дойду Кубога ыытылынна. Кубокка, аан дойду былырыыҥҥы чөмпүйэнээтин түмүгүнэн аҕыс бастыҥ көрдөрүүлээх хамаанда (Арассыыйа, АХШ, Грузия, Куба, Япония, Иран, Турция уонна Монголия хамаандалара) күрэс былдьаста.
Сүүмэрдиир хапсыһыылар түмүктэринэн, кылаабынай тириэньэр Дзамболат Тедеев Кубокка кыттар Арассыыйа хамаандатын састаабын быһаарбыта. Манна 57 уонна 65 киилэҕэ диэри ыйааһыннарга саха тустуутун оскуолатын иитиллээччилэрэ Арыйаан Тютрин уонна Виктор Рассадин киирэн, ситиһиилээхтик туһуннулар.
Бүтэһигин Кубок Арассыыйаҕа 2011 сыллаахха ыытыллыбыта. Оттон ааспыт сыл сэтинньитигэр Арассыыйа тустууга федерацията, аҕыс сыл тохтобул кэнниттэн көҥүл тустууга Аан дойду кубога Дьокуускайга буолуоҕа диэн иһитиннэрбитэ. Маныаха Ил Дархаммыт Айсен Николаев федерация бэрэсидьиэнигэр Михаил Мамиашвилига уонна көҥүл тустууга Арассыыйа сүүмэрдэммит хамаандатын кылаабынай тириэньэригэр Дзамболат Тедеевкэ этии киллэрбитин санатыахха наада. Кинилэри уонна көҥүл тустуу норуоттар икки ардыларынааҕы федерациятын кытта кэпсэтиигэ аатырбыт тустуук, Ил Түмэн дьокутаата Виктор Лебедев көхтөөхтүк кыттыбыта.
Ааспыт өрөбүллэргэ олохтоохтор бары өр күүппүт улахан тэрээһиммит өрө күүрүүлээхтик, үрдүк таһымнаахтык ааста. Арассыыйа сүүмэрдэммит хамаандата кыайан, уолаттарбыт Арыйаан Тютрин уонна Виктор Рассадин чаҕылхай хапсыһыылары көрдөрөн, үөрүүбүт өссө үксээтэ.
Көҥүл тустууну Саха сиригэр курдук күүскэ таптыыр сир аан дойдуга аҕыйах буолуохтаах. Биһиэхэ өтөрүнэн буолбатах улахан тэрээһин – көҥүл тустууга аан дойду Кубога ыытыллыбыта дьоһун бэлэх буолан үйэлэргэ өйбүтүттэн-санаабытыттан умнуллуо суоҕа.
Айтана Аммосова, edersaas.ru