Айсен Николаев креативнай индустрияны өйүүр аналлаах федеральнай офиһы тэрийэр туһунан этии киллэрдэ

Москва куоракка Арассыыйатааҕы креативнай нэдиэлэ буола турар. Онно Ил Дархан Айсен Николаев кытта сылдьар. 

Мунньах кэмигэр Айсен Николаев дойдуга креативнай индустрияны сайыннарарга төһүү күүһүнэн буолар аналлаах федеральнай офиһы тэрийэргэ этии киллэрдэ. Бу идиэйэни РФ Бэрэсидьиэнин дьаһалтатын  салайааччытын 1-кы солбуйааччы  Сергей Кириенко өйүүрүн биллэрдэ уонна итинник хабааннаах тэрилтэни тэрийии туһунан кэпсэтии бара турарын туһунан иһитиннэрдэ.

«Креативнай индустрия араҥата олус киэҥ: киинэ, айти-технология уонна ювелирнай бырамыысыланнас бааллар. Балары тус-туспа биэдэмистибэлэр хонтуруоллаан үлэлэтэллэр. Холобур, култуура, бырамыысыланнас, экэниэмикэ министиэристибэлэрэ… Онон итинник хабааннаах киэҥ уонна элбэх хайысхалаах салааҕа бырайыактыыр офис наада. Пуорматын быһыытынан агентство да буолуон сөп.  Креативнай индустрия арҕаа дойдулар сааҥсыйаларыттан сылтаан симэлийэн эрэллэри солбуйбакка,  дойдубут култуурунай  эйгэтин сайыннарыыга төһүү күүһүнэн буолуохтаах. Ол эбэтэр Арҕааттан сүрүн уратыбыт диэн биһиэхэ  киһиэхэ аналлаах сыаннастар, саҥа идиэйэлэр бааллар» — диэн Айсен Николаев бары өттүнэн олус сөптөөх санааны эттэ.

Онуоха  РФ Бэрэсидьиэни дьаһалтатын  салайааччытын 1-кы солбуйааччы  Сергей Кириенко: «Олус үчүгэй идиэйэ.  Чиэһинэйдик этэр буоллахха, РФ Бырабыыталыстыбатыгар  креативнай индустрияҕа эппиэттиир Дмитрий Чернышенколыын ити туһунан толкуйдаабыппыт.  Ону тэҥэ, үөрэх, култуура бэлиитикэтигэр эппиэттиир Татьяна Голиковалыын эмиэ ити боппуруоска дьүүллэһиини, кэпсэтиини тэрийбиппит. Онон сотору сөптөөх быһаарыныы ылыллыа диэн эрэнэбин», — диэн эттэ.

Ил Дархан Айсен Николаев итинник хабааннаах структура тас эрэ дойдуларга буолбакка, Арассыыйа сорох эрэгийиэннэрин сэргэ Саха сиригэр баарын санатта.