Бүгүн, бэс ыйын 9 күнүгэр, Ил Дархан Айсен Николаев өрөспүүбүлүкэҕэ коронавирус балаһыанньатын иһитиннэрдэ.
edersaas.ru
—Бүгүҥҥү чахчынан, өрөспүүбүлүкэ үрдүнэн барыта 2968 киһи коронавирус дьаҥынан ыалдьыбыта бэлиэтэнэр. Ааспыт хонук иһигэр 70 киһи дьаҥҥа хаптарбыт. Саҥа ыалдьыбыттартан 60-на Дьокуускай куорат олохтоохторо. Ону таһынан үстүү ыарыһах Нам уонна Алдан улуустарыгар көстүбүттэр, атын оройуоннарга биирдиилээн түгэннэр бэлиэтэммиттэр.
Бүгүҥҥү күҥҥэ тест ыытыытын ахсаанынан Арассыыйаҕа бастыҥ эрэгийиэннэрин иһигэр киирсэбит. Ааспыт күҥҥэ 4 тыһыынчаттан тахса тест оҥоһулунна, бу миэрэ ыарыһахтары эрдэ булан эмтээһин, сэрэтии үлэлэрин ыытарга көмөлөһөр.
Манна даҕатан этиэхпин баҕарабын — хомойуох иһин, коронавируска оҕо сутуллуутун ахсаана үрдээн иһэр. Стационарга уонна дьиэттэн сылдьан эмтэнэр 1500 кэриҥэ дьонтон 23% оҕолор буоллулар. Дьиэттэн сылдьан эмтэнэр дьон иһигэр оҕо өттө 36%. Оҕолор сүрүннээн ыарыыны чэпчэкитик уйуналлар эрээри, кинилэр дьиэ кэргэн иһигэр ыарыыны тарҕаталлара бэлиэтэннэ.
Билигин элбэх оҕо сайыҥҥы сынньалаҥ кэмигэр куораттан тыаҕа тахсан эрэллэр. Онон оҕолор нөҥүө тыа олохтоохторугар ыарыыны тарҕатыы куттала үөскээтэ, соторутааҕыта итинник түбэлтэлэр бэлиэтэннилэр. Мин бүгүн Доруобуйа харыстабылын министиэристибэтигэр улуус салайааччыларын кытта бииргэ бу боппуруоһу көрөллөрүгэр сорудах биэрдим. Быраастар миэстэтигэр оҕолору икки нэдиэлэлэ устата кэтээн көрүөхтээхтэр, ордук чуолаан Дьокуускайтан кэлэр оҕолору. Бу миэрэ оҕолор уонна олохтоох нэһилэнньэ доруобуйаларын харыстыырга туһаайыллар.
Егор Карпов, «Саха сирэ» хаһыат, edersaas.ru