СӨ Ил Дархана Айсен Николаев кикбоксиҥҥа Арассыыйа чөмпүйэнээтин уонна күрэхтэһиитин тэрийээччилэрин, кыттааччыларын уонна көрөөччүлэрин эҕэрдэлиир.
Күндү доҕоттор! Бүгүн биһиги ыалдьытымсах өрөспүүбүлүкэбит икки улахан спортивнай тэрээһини тэрийэр – кикбоксиҥҥа улахан дьоҥҥо Арассыыйа чөмпүйэнээтин уонна оҕолорго Арассыыйа күрэхтэһиитин.
Бу улахан күрэхтэһиилэр саха кикбоксера Александр Иванов сырдык кэриэһигэр ананаллар. Кини 30 сыл анараа өттүгэр ССРС успуордун устуоруйатыгар аан маҥнайгынан кикбоксиҥҥа Аан дойду чөмпүйүөнүнэн буолбута. Бу саха киһитин өйүгэр үйэлэргэ хаалбыт спортивнай ситиһии буолар.
Александр Иванов кэнниттэн үгүс саха дьоно кикбоксиҥҥа кэккэ ситиһиилэммиттэрэ: Аан дойду алта төгүллээх чөмпүйүөнэ Оксана Васильева, аан дойду үс төгүллээх чөмпүйүөнэ Иннокентий Макаров, Аан дойду икки төгүллээх чөмпүйүөннэрэ Василий Васильев уонна Лидия Андреева, Аан дойду чөмпүйүөнэ Василий Павлов, Сергей Миронов уонна Мария Кривошапкина.
Кикбоксинг – көннөрү успуорт эрэ буолбатах. Кикбоксинг үрдүк сыаллары туруорарга, утарсааччыны убаастыырга, охтон баран турарга, саҥа үктэллэри дабайарга үөрэтэр.
Убаастабыллаах ыалдьыттар, тириэньэрдэр, судьуйалар, спортсменнар, көрөөччүлэр, успуорду сэҥээрээччилэр! Саха сирэ – Олоҥхо ытык дойдута, эһигини үөрэн-көтөн туран көрсөр. Күрэхтэһии үрдүк таһымҥа ыытыллыа, оттон күрэхтэһээччилэр кыраһыабай киирсиилэри бэлэхтиэхтэрэ диэн эрэнэбин. Бары кыттааччыларга ситиһиини, күүһү, эр санааны баҕарабын!
СӨ Ил Дархана Айсен Николаев.
Хаартыска yakutia.info