Айсен Николаев ТАСС-ка биэрбит улахан интервьютугар Саха сиригэр киинэ сайдыытын туһунан ахтан аһарда:
— Ситиһиилээхтик сайда турар киинэбит эйгэтэ уруккутун курдук биһигиттэн үп да өттүнэн, тэрээһин да кыһалҕаларыгар мэлдьи өйөбүлү ыла туруоҕа. Өрөспүүбүлүкэ бырабыыталыстыбатыгар ол туһунан тустаах дьаһалы биэрэн турабын. Ол курдук, төһө даҕаны уустук кэмнэр кэлбиттэрин иһин быйыл саха киинэтэ 80 мөл. солк. сайдыыга харчы ылыаҕа. 2022-2023 сыллааҕы сезоҥҥа көстүөхтээх хартыыналар билигин бары кэриэтэ түмүктэнэн тахсар кэмнэрин күүтэн сыталлар. 2024-2025 сыллааҕы бырайыактар аһаҕас күрэххэ кыттан документальнай уонна уус-уран хайысхаларынан үллэриллиэхтэрэ. Былаан өттө баараҕай – хас даҕаны Арассыыйа уонна аан дойду таһымнаах боччумнаах бырайыактар бааллар. Ааспыт сылларга курдук көрөөччүлэр, критиктэр үрдүк сыанабылларын ылыахтара диэн эрэнэбин. Биһиги Уһук Илиҥҥи эрэгийиэҥҥэ тастан киинэ хампаанньалара кэлэн киинэ усталларыгар усулуобуйа тэрийэр туһунан араас толкуйдар бааллар. Саха сиригэр олус кэрэ көстүүлээх, хатыламмат дьикти сир-уот баар. Ону таһынан чугастыы сытар Камчаткаҕа, Приморьеҕа биһиги тэрээһиммитигэр тирэҕирэн тиийиэхтэрин сөп. Итинтэн сиэттэрэн туризм, өҥө оҥоруу салааларын сайыннарыахха сөп. Аны атын дойдулары кытта киинэ эйгэтигэр уопут атастаһыыта күүһүрүөхтээх. Бу сабаҕалыырбытын Илини сайыннарыы министиэристибэтигэр көрүүгэ киллэрбиппит. Саха сирэ бу хайысхаҕа суолу тэлээччи буолар кыахтаах.
«Саха сирэ» хаһыат, edersaas.ru
Хаартыска ТАСС