Ытыктабыллаах Саха сирин олохтоохторо!
Саха Өрөспүүбүлүкэтин салалтатын уонна тус бэйэм ааппыттан эһигини кэлэн иһэр Саҥа 2022 сылынан уонна Ороһооспонон ис сүрэхпиттэн эҕэрдэлиибин!
Саҥа дьыл – саамай күүтүүлээх күндү бырааһынньыкпыт, ааспыты анаарар, инникини торумнуур, саҥаны саҕалыыр эриэккэс түгэммит. Ону кытта түмүктэри таһааран, саҥа соруктары туруорунар эппиэтинэстээх кэммит.
Ааһан эрэр 2021 сыл умнуллубат түгэннэринэн баай уонна тыҥааһыннаах этэ. Өрөспүүбүлүкэ олохтоохторо сомоҕолоһуубут, төрөөбүт дойдубутугар тапталбыт күүһүнэн, бары бииргэ уустук тургутуулары аастыбыт, бэйэбитигэр эрэлбит улаатта.
Күннэтэ коронавируһу утары охсуһар, дьону быһыыр медиктэрбитигэр махтанабын. Аан дойду үрдүнэн бу дьаҥ олохпутун тосту уларытта, ол да буоллар биһиги туруулаһабыт. Сыстыганнаах ыарыы кутталлааҕын өйдөөн быһыыны ылбыт биир дойдулаахтарбар махтанабын.
2021 сыл өрөспүүбүлүкэбитигэр Доруобуйа сылынан биллэриллибитэ, оттон кэлэр уон сыл – Доруобуйа уон сылынан биллэрилиннэ. Онон 2030 сылга олох уопсай уһунунан 80 уонна онтон үрдүк сыл көрдөрүүлээх эрэгийиэннэр ахсааннарыгар киирэр сорук туруорулунна.
Ааспыт сайын өтөрүнэн буолбатах өҥүрүк куйаас, уот кураан сатыылаан, ойуур баһаардара хаһааҥҥытааҕар да киэҥ иэннээх сири күл-көмөр оҥордулар. Онуоха баай хара тыабытын, бөһүөлэктэрбитин көмүскээбит уоту утары охсуһар буойуттарбытыгар, сүрэхтэрин баҕатынан кинилэргэ көмөлөспүт дьоммутугар-сэргэбитигэр махтал, ытыктабыл үтүө тылларын этэбит. Биһиэхэ Россия бүттүүн көмөлөһөн, сүүнэ улахан дойдубут сомоҕолоһуу холобурун көрдөрдө. 2022 сылга өрөспүүбүлүкэҕэ ойууру баһаартан харыстыырга федеральнай бүддьүөттэн 5,5 төгүл элбэх үп көрүллүөҕэ.
Биһиги, төһө да уустуктар баалларын үрдүнэн, экэниэмикэ үгүс салаатыгар, социальнай эйгэҕэ уонна уопсастыбаннай олоххо дьоһун ситиһиилэрдээхпит.
Ол курдук, таас чоҕу, кыһыл көмүһү хостуур бырамыысыланнаска хаһааҥҥытааҕар да үрдүк көрдөрүүлэннибит. Саҥа сылга тус бэйэтин дохуота улаата турар бүддьүөттээх киирэн эрэбит. Тыа сирин үлэһитин өйүүр дьаһаллары кэҥэттибит. Нэһилиэнньэлээх пууннарга гааһы киллэриини, олорор дьиэлэри, социальнай эбийиэктэри, суоллары тутууну салгыы ыытыахпыт. Саҥа тэрилтэлэр үлэҕэ киирдэхтэринэ үлэ миэстэтэ тахсыаҕа. Бу барыта инникитин олох бары эйгэтигэр бигэ туруктаах буоларбытыгар эрэли үөскэтэр.
Кэлэн иһэр 2022 сыл биһиэхэ ураты суолталаах – элбэх норуоттаах өрөспүүбүлүкэбит сайдыытыгар саҥа үйэ саҕаланыаҕа. Онуоха Саха сирин хас биирдии олохтооҕо Саха сирин сүүс сыллаах сайдыытын былааныгар бэйэтин этиитин киллэрэр кыахтаах. Онон бука бары сүбэбитин холбоон, саҥа үрдэллэри бииргэ дабайыахпыт. Онуоха үбүлүөйдээх сыл Ийэ сылынан биллэриллибитэ кэрэхсэбиллээх.
Биһиги туох-ханнык иннинэ кэлэр көлүөнэ ыччат төрөөбүт дойдута чэчирии сайдарын туһугар айар-тутар кыахтанарыгар Сахабыт сирэ тоҕоостоох сир буоларын хааччыйыах тустаахпыт. Бары бииргэ ылыстахпытына, бу сорук туолуоҕа диэн бигэ эрэллээхпин.
Күндү доҕоттор! Эһиэхэ үөрүүнү-көтүүнү, баҕа санаа туолуутун, чэгиэн-чэбдик доруобуйаны, табыллыыны, уйгулаах олоҕу баҕарабын! Эдэрдии эрчимнээх, сылайбат сындаалаах, дьоллоох-соргулаах буолуҥ! Саҕалаабыккыт барыта сатаннын! 2022 сыл үгүс кэрэ түгэни, үчүгэй эрэ уларыйыылары аҕаллын!
Саргылаах Саҥа дьылынан, Ороһооспонон, ытык-мааны Сахам сирин олохтоохторо!
Саха Өрөспүүбүлүкэтин Ил Дархана Айсен Николаев