Айсен Николаев: «Күргүөм иммунитеттанары ситиһии, быһыыны биэрэр хампаанньа тэтимиттэн тутулуктаах»

Ааптар: 
Бөлөххө киир:
СӨ Ил Дархана Айсен Николаев бүгүн, балаҕан ыйын 21 күнүгэр, өрөспүүбүлүкэҕэ коронавирус дьаҥын бохсууга үлэлэһэр суһал ыстаап  уочараттаах мунньаҕын улуустар, куорат уокуруктарын баһылыктара кыттыылаах ыытта.
Бастатан туран, Ил Дархан улуустар баһылыктарыгар бары санитарнай-эпидемилогическай ирдэбиллэри тутуһан туран, быыбар хампаанньата көхтөөхтүк ыытыллыбытыгар махтанна. Ол да буоллар, COVID-19 дьаҥынан сибээстээн, өрөспүүбүлүкэҕэ быһыы-майгы судургута суоҕа этилиннэ.
Роспотребнадзор Саха сиринээҕи управлениетын чахчытынан, балаҕан ыйын 21 күнүгэр, өрөспүүбүлүкэҕэ барыта 170 киһи эбии коронавирустаабыта быһаарыллыбыт. Ол иһигэр Дьокуускай куоракка – 102. Оттон 23 оройуоҥҥа саҥа ыалдьааччылар бэлиэтэммиттэр.
Балаҕан ыйын 14 күнүттэн саҕалаан, нэдиэлэ устатыгар, өрөспүүбүлүкэҕэ коронавирустааччы ахсаана 170 уонна онтон элбэҕэ ыйыллар. Итиниэхэ кэтээн көрүүнэн, дьаҥнааччы ахсаана элбээн иһэрэ этилиннэ. Саҥа ыалдьааччылар ордук Алдан, Мииринэй, Сунтаар оройуоннарыгар уонна Дьокуускай куоракка бэлиэтэнэллэр.
Өрөспүүбүлүкэҕэ балыыһаҕа киирээччилэр, тастан эмтэнээччилэр уонна хантаактаахтар ахсааннара элбээбит. Ыараханнык ыалдьааччылар уонна олохтон туорааччылар ахсааннара кыччаабат. Бүгүҥҥү күҥҥэ Дьокуускай куорат реанимацияҕа отделениеларыгар уонна аҕыс оройуон киин балыыһаларыгар 127 киһи эмтэнэр, итинтэн ыарахан туруктаах 30 ыарыһах ИВЛ аппараатыгар холбонон сыталлар.
Айсен Николаев коронавирус дьаҥын бохсууга үлэлэһэргэ сүрүн соругунан, ковиды утары вакцинация уонна ревакцинация туһатын, хааччахтыыр миэрэлэри:  мааскалаах сылдьыы, бэйэ икки ардыгар тэйиччи сылдьыыны тутуһуу туһунан иһитиннэрэр-биллэрэр үлэлэри чугастааҕы икки нэдиэлэҕэ күүһүрдэр наадалааҕын быһаарда. Кини күргүөм иммунитеттанары ситиһии быһыыны ылыы ахсааныттан эрэ буолбакка, быһыыны биэрэр хампаанньаны ыытыы тэтимиттэн эмиэ тутулуктааҕын санатта.
СӨ Доруобуйа харыстабылын миниистирэ Елена Борисова өрөспүүбүлүкэ 18 оройуонугар коронавируһунан ыалдьааччы элбээбитин эттэ.  Ити Дьокуускай куоракка, Нерюнгригэ, Мииринэйгэ уонна Мэҥэ Хаҥалас улууһугар.
Ааспыт нэдиэлэни кытта тэҥнээтэххэ, өрөспүүбүлүкэ үрдүнэн коронавирустан эмтэнээччи ахсаана 17% улааппыт, ыараханнык ыалдьааччы — 19,7%. Оҕолор ыалдьыылара эмиэ элбээбит. Хомойуох иһин, бу ыалдьыбыттартан 20% оҕолор.
СӨ Роспотребнадзор управлениетын салайааччытын солбуйааччы Изабелла Самойлова бэлиэтииринэн, өрөспүүбүлүкэҕэ маны сэргэ, икки кэнники нэдиэлэҕэ тымныйан (ОРВИ) ыалдьааччы элбээбит, бу ордук оскуола оҕолоро уонна ыччаттар. Онон оскуолаларга, орто анал уонна үрдүк үөрэх кыһаларыгар, ону сэргэ бары тэрилтэлэргэ кыраадыстара тахсыбыт, ОРВИ сибикилээх дьону тута быһааран үөрэххэ да, үлэҕэ да киллэрбэт курдук, сарсыардааҥҥы бэрэбиэркэни ыытыыны күүһүрдэргэ этилиннэ.
Мунньах кыттыылаахтара улахан болҕомтону бу кэмҥэ кирииптэн вакцинацияны тэрийии боппуруоһугар уурдулар.
Хаартыскаларга Мария Васильева (СИА) түһэриитэ
+1
0
+1
0
+1
0
+1
0
+1
0
+1
0
+1
0