Айсен Николаев кардиология диспансерыттан ураты саҥа балыыһа тутулларын эттэ
Дьокуускайга Сэргэлээх шоссетыгар өрөспүүбүлүкэтээҕи кардиология диспансера тутулла турар. Эһиил ахсынньыга бүтэрэр былааннаахтар. Күн бүгүн эбийиэк 31,4 % бэлэм. Сэтинньи 28 күнүгэр Ил Дархан Айсен Николаев үлэ хаамыытын билистэ.
150 миэстэлээх киин тутуута былаан быһыытынан баран иһэр. Эбийиэк 31,4 % -на бэлэм, бары 8 этээһин туппуттар, модульнай хочуолунайы туруорбуттар, сылааһын биэриитин саҕалаан эрэллэр. Эһиил ахсынньыга үлэҕэ киллэрэр былааннаахтар. Уопсай иэнэ – 15,5 тыһыынча кв. миэтэрэ.
Тутар-таҥар үлэтин кэнниттэн тэрили туруорууну саҕалыахтара. Маныаха Ил Дархан сүрэх-тымыр ыарыытын эмтииргэ туох баар аныгы ирдэбилгэ эппиэттиир тэрили туруоруҥ диэн эттэ.
“Бу курдук дьоһуннаах эбийиэк тутуута мэдиссиинэ өҥөтүн хаачыстыбатын биллэ тупсарыаҕа уонна сүрэх-тымыр ыарыытыттан өлүүнү аччатыаҕа. Биһиэхэ кардиохирургияҕа номнуо үчүгэй ситиһиилэр бааллар. Киин үлэҕэ киирдэҕинэ ситиһии өссө элбииригэр эрэнэбин. Манна турар тэрил норуоттар икки ардыларынааҕы аныгы ирдэбилгэ эппиэттиэҕэ”, — диэтэ Николаев.
Кардиология киинин тутуута 2024 сылга хаан эргиирин систиэмэтин ыарыытыттан өлөр дьон ахсаанын 364-тэн 279-ка диэри (100 тыһыынча нэһилиэнньэҕэ) намтатыаҕа. Саха сирин олохтоохторун өлүүтүн сүрүн төрүөтэ үксүгэр бу ыарыылартан буолар. Ордук инсультан уонна инфарктан, кэлиҥҥи кэмҥэ соһуччу коронарнай уонна аритмическай өлүү түгэннэрэ үрдээбит.
Айсен Николаев кардиология диспансера уонна да атын улахан эбийиэктэр федеральнай киин, дойду бэрэсидьиэнэ Владимир Путин уонна кини Уһук Илин уокурукка боломуочуйалаах бэрэстэбиитэлэ Юрий Трутнев өйөбүллэринэн тутулларын санатта.
Ил Дархан Саха сиригэр мэдиссиинэ өссө биир тэрилтэтэ – 245 куойкалаах өрөспүүбүлүкэтээҕи клиническэй инфекционнай балыыһа тутуллуоҕун туһунан иһитиннэрдэ уонна тутуллуон сөптөөх миэстэтин көрдө. Күн бүгүн эбийиэк бырайыактыыр-симиэтэлиир докумуонун оҥоһуута бүтэн эрэр.
“Эһиил доруобуйа харыстабылын өссө биир эбийиэгин тутуутун хайаан даҕаны саҕалыыр ирдэнэр. Бу сылларга былааннамматаҕа эрээри, олох бэйэтин уларытыыларын киллэрэр. Пандемия биһиэхэ итини чопчутук көрдөрдө. Эһиилги сылтан өрөспүүбүлүкэтээҕи клиническэй инфекционнай балыыһа тутуутун саҕалыахпыт. Хомойуох иһин, биһиэхэ маннык анал балыыһа суох. Баар салаалар 1960-1970-с сылларга тутуллубут дьиэлэргэ үлэлии тураллар. Инфекционнай ыарыылаах дьону эмтииргэ сөп түбэһэр ирдэбил учуоттаммат” – диэн Ил Дархан эттэ.
Санатан эттэххэ, киин бастакы уочаратын 2012 сыллаахха Мэдиссиинэ национальнай киинин структурнай тэрилтэтин быһыытынан аспыттара. Кардио-сосудистай киин иккис уочаратын тутуута 2019 сыл сайын саҕаламмыта. Эбийиэк Уһук Илиҥҥи уокурук экэниэмикэтин үрдэтии киинин сайыннарар бырагырааматыгар киирбитэ, дойду хааһынатыттан 4,5 миллиард солкуобай үп көрүллүбүтэ.
СӨ Ил Дарханын уонна Бырабыыталыстыбатын пресс-сулууспата.