Сүрүн

Айсен Николаев Өймөкөөн улууһугар ыытыллар Олоҥхо Ыһыаҕар бэлэмнэнии боппуруостарын ырытта

Атырдьах ыйын 29 күнүгэр Ил Дархан Айсен Николаев Өймөкөөн улууһугар ыытыллыахтаах XVI Олоҥхо Ыһыаҕар бэлэмнэниигэ уонна ыытыыга туһуламмыт тэрийэр кэмитиэт мунньаҕын ыытта.

Үгэс буолбут национальнай бырааһынньык 2023 сыл от ыйын 1-2 күннэригэр Өймөкөөн улууһун Томтор нэһилиэгэр “Көмүс күрүө” этнокултуурунай комплекска ыытыллыаҕа.

«Өймөкөөн улууһугар ыытыллар Олоҥхо Ыһыаҕа – олус улахан суолталаах тэрээһин. Бу иннинэ хоту улуустартан Дьааҥы улууһугар эрэ Олоҥхо Ыһыаҕа ыытыллыбыта.  Ыраах сытар улууска, биллэн туруар, маннык далааһыннаах тэрээһини ыытыыга кэккэ уустуктар бааллар эрээри, оройуон сайдар устуоруйатын, бу улуус духуобунас уонна култуура эйгэтэ сайдыытыгар оруолун  учуоттаан, Олоҥхо Ыһыаҕын бу улууска ыытарга быһаарыыны ылыммыппыт. Онон бу өрөспүүбүлүкэтээҕи тэрээһин үрдүк таһымнаахтык ыытылларын ситиһиэхтээхпит», — диэн эттэ Ил Дархан.

Айсен Николаев бэлиэтээбитинэн, үгэс  быһыытынан оҥоһуллар сиэри-туому ыытар эбийиэктэр тутууларын, айан-сырыы боппуруостарын, ыалдьыттары түһэрэр уонна аһатар сир, электричество уотунан,  суотабай сибээһинэн  хааччыйыы, култуурунай бырагыраама – бу боппуруоһу барытын быйыл быһааран бэлэмниэххэ наада.

Вице-премьер Сергей Местников иһитиннэрбитинэн, XVI Олоҥхо Ыһыаҕар бэлэмнэнии былаана  балаҕан ыйын 20 күнүгэр бигэргэниэҕэ.

Ил Дархан Айсен Николаев тутуу эбийиэктэрин холобурдаан туран, ороскуот симиэтэтин тэрийэр кэмитиэт  суһаллык бэлэмнииригэр, министиэристибэлэргэ уонна биэдэмистибэлэргэ Олоҥхо Ыһыаҕар бэлэмнэниигэ тустаах былаан ылыналларыгар уонна онно сыһыаннаан тэрээһиннэри ыытарга соруйда. Балаҕан ыйыгар-сэтинньигэ Олоҥхо Ыһыаҕын тэрийэр режиссерскай-постановочнай бөлөх Томторго тиийэн үлэлиэҕэ.

Сэтинньи бүтэһигэр Томторго «Олоҥхо Ыһыаҕа Өймөкөөҥҥө: эпическэй нэһилиэстибэни сөргүтүү, тарҕатыы уонна харыстааһын» тиэмэҕэ XIII өрөспүүбүлүкэтээҕи научнай-методическай кэмпириэнсийэ ыытыллыаҕа.

Кыраапык быһыытынан, Олоҥхо Ыһыаҕа Өймөкөөн улууһугар 2023 сылга, 2024 сылга — Амма улууһугар,   2025 сылга — Нерюнгри  оройуонугар ыытыллыаҕа.

Елена ПОТОЦКАЯ, «Саха сирэ» хаһыат.

Хаартыска — Мария Васильева, СИА.

0
0
Telegram Whatsapp