Ил Дархан Айсен Николаев бүгүн “Космическэй сибээс” тэрилтэ генеральнай дириэктэрэ Алексей Волины кытары көрсөн, доруобуйа харыстабылыгар спутник сибээһин сайыннарыы туһунан кэпсэттэ.
Саха сирэ “Космическэй сибээс” тэрилтэни кытары спутник сибээһин сайыннарыыга дуогабар баттаһыахтаах. Бу чэрчитинэн, өрөспүүбүлүкэбитигэр доруобуйа харыстабылын 90 эбийиэгэр спутнигынан интэриниэт ситимэ киириэхтээх. Ил Дархан Айсен Николаев бэлиэтииринэн, бу үлэ ыраахтан олорон ыарыһаҕы көрүүгэ, диагноз туруорууга төһүү буолуохтаах. Бу ордук суола-ииһэ, сибээһэ суох Арктика уонна хотугу улуустарга тыын боппуруос.
Федеральнай тэрилтэ салайааччыта Алексей Волин көрсүһүүгэ иһитиннэрбитинэн, бу сыалга “Экспресс АМУ 3” уонна “Экспресс АМУ7” спутниктар туһаныллыахтара. “Бу саҥа спутниктар көмөлөрүнэн сибээс икки сыл иһигэр үс төгүл тупсуоҕа”, – диэн этэр кини. Санатан эттэххэ, билигин бу спутниктарынан туһанан биһиэхэ “АрктикТелеком” уонна “РЦИТ” үлэлииллэр. Өрөспүүбүлүкэ 211 эбийиэгэ барыта бу спутниктарга холбонон олорор.
Аграфена КУЗЬМИНА