Саха сирин Ил Дархана Айсен Николаев чэппиэргэ, муус устар 25 күнүгэр, Ил Түмэн сэттис (уочараттаах) пленарнай мунньаҕар былаас ситэриилээх уорганнарын 2018 сылга үлэлэрин туһунан отчуоттуоҕа.
Айсен Николаевка бу Саха сирин баһылыгын быһыытынан өрөспүүбүлүкэ бырабыыталыстыбатын саҥа састаабын үлэтин туһунан бастакы отчуота буолар.
Отчуокка регион баһылыга ааспыт сылга бырабыыталыстыба ылыммыт тутаах быһаарыыларын, национальнай бырайыактары олоххо киллэрии миэрэлэрин туһунан сиһилии кэпсиэҕэ уонна 2019 сылга өрөспүүбүлүкэ салалтатын иннигэр турар соруктары чопчулуоҕа.
Салгыы Айсен Николаев Ил Түмэн норуодунай дьокутааттарын – араас фракциялар бэрэстэбиитэллэрин ыйытыыларыгар хоруйдуоҕа.
Ил Дархан уонна бырабыыталыстыба пресс-сулууспата иһитиннэрэринэн, “Саха Өрөспүүбүлүкэтин Ил Дарханын туһунан” Төрүт сокуоҥҥа сөп түбэһиннэрэн, өрөспүүбүлүкэ баһылыга Судаарыстыбаннай Мунньахха (Ил Түмэҥҥэ) судаарыстыбаннай былаас ситэриилээх уорганнарын үлэлэрин туһунан сыллата дакылаат оҥоруохтаах, ол иһигэр СӨ Ил Түмэнэ туруорар боппуруостарынан.
СИА