Айсен Николаев Ил Дархан солотугар киирэр сиэрэ-туома Д.К.Сивцев — Суорун Омоллоон аатынан Опера уонна балет судаарыстыбаннай тыйаатырыгар киэһэ 5 чаастан саҕаланна.
edersaas.ru
Быыбар киин хамыыһыйатын бэрэссэдээтэлэ Алексей Ефимов балаҕан ыйын 9 күнүгэр ыытыллыбыт Ил Дархан быыбарыгар хандьыдаат Айсен Николаев туһатыгар 229 тыһ. 314 киһи, ол эбэтэр быыбардааччы 71,41 % куоластаабытын, онон сокуоҥҥа сөп түбэһиннэрэн, Быыбар киин хамыыһыйата Саха Өрөспүүбүлүкэтин Ил Дарханынан Айсен Сергеевич Николаевы ааҕарга уураахтыырын иһитиннэрдэ итиэннэ норуот итэҕэлин ылбытынан эҕэрдэлээн туран, Ил Дарханынан талыллыбытын туһунан дастабырыанньаны туттарда.
Конституционнай суут бэрэссээдэтэлэ Александр Ким-Кимэн саҥа талыллыбыт Ил Дархан дуоһунатыгар киирэр Андаҕарын этэригэр ыҥырбытыгар, Айсен Николаев сахалыы уонна нууччалыы:
– Саха Өрөспүүбүлүкэтин Ил Дарханын эбээһинэһин үтүө суобастаахтык толоруом, Арассыыйа Федерациятын Конституциятын уонна федеральнай сокуоннары үтүө суобастаахтык толоруом, Саха Өрөспүүбүлүкэтин Конституциятын уонна сокуоннарын тутуһуом, өрөспүүбүлүкэ национальнай судаарыстыба быһыытынан анал туругун итиэннэ элбэх омуктаах норуотун интэриэһин көмүскүөм, киһи уонна гражданин быраабын ытыктыам диэн бэйэм үтүө ааппынан уонна дьоһуммунан андаҕайабын! – диэтэ.
Ким-Кимэн Айсен Николаевы Саха Өрөспүүбүлүкэтин Ил Дарханын үрдүк солотугар киирбитин биллэрбитигэр, Арассыыйа Гимнэ итиэннэ Саха Өрөспүүбүлүкэтин Өрөгөй ырыата дуораһыйдылар, сааланы толору мустан олорор дьоннор, өрөспүүбүлүкэ бэтэрээннэрэ, норуот хаһаайыстыбатын үтүөлээх үлэһиттэрэ, Ил Түмэн дьокутааттара уо.д.а. дохсун ытыс тыаһынан эҕэрдэлээтилэр. Дьоһун түгэн долгутуутун күүһүрдэн, маҥнайгы Бэрэсидьиэн, өрөспүүбүлүкэ Судаарыстыбаннай Сүбэһитэ Михаил Николаев Айсен Николаевка Ил Дархан бэлиэтин туттарда.
– Ытыктабыллаах Сахам сирин бар дьоно, күндү ыалдьыттар, ытык-мааны доҕоттор! Бастатан туран, итэҕэлгит иһин ис сүрэхпиттэн махтанабын. Мин үлэм, өйүм-санаам сүрүн ирдэбилинэн Саха сирин олохтоохторун иннилэригэр эппиэтинэс буолла. Туох баар билиибин-көрүүбүн, күүспүн-уохпун төрөөбүт дойдубут инники сайдыытыгар аныаҕым, – диэтэ Айсен Николаев итиэннэ ааспыт түөрт ый устата өрөспүүбүлүкэ бары улуустарыгар сылдьыбытын, дьон-сэргэ үтүө уларыйыылары кэтэһэрин, толору күүһүнэн үлэлииргэ-хамсыырга тардыһарын, эргиччи сайдыылаах өрөспүүбүлүкэҕэ олоруон баҕарарын бэлиэтээбитин эттэ. Күн бүгүн олоххо киллэриллэр аан дойду таһымнаах индустриальнай бырайыактар Саха сирин экономикатын төрдө итиэннэ дойду лидер буоларыгар кылаата буолар диэтэ, өрөспүүбүлүкэ инники сайдыытыгар көрүүлэрин билиһиннэрдэ.
РФ Бырабыыталыстыбатын бэрэссэдээтэлин солбуйааччы – Уһук Илин федеральнай уокурукка Бэрэсидьиэн боломуочуйалаах бэрэстэбиитэлэ Юрий Трутнев, быыбарга Арассыыйа үрдүнэн биир бастыҥ түмүгү ситиспитиҥ дьон эйиэхэ эрэнэрин көрдөрөр диэн туран, Айсен Николаевка үлэтигэр ситиһиини баҕарда, өрөспүүбүлүкэ нэһилиэнньэтин олоҕун-дьаһаҕын сылтан сыл тупсаран иһэргэ элбэх үлэ күүтэр, ол туһугар бииргэ үлэлиэхпит диэтэ.
Ил Дархан солотугар киирии сиэрин-туомун официальнай чааһа түмүктэнэн, Айсен Сергеевич кэргэнин Людмила Валерьевнаны итиэннэ ыалдьыттарын кытары тахсыбыттарыгар, тыйаатыр инниттэн саҕалаан Доҕордоһуу болуоссатын толору мустубут дьон эҕэрдэлии көрүстүлэр.
– Үтүө киэһэнэн, күндү доҕоттор, – диэтэ Ил Дархан. – Бастатан туран, бука барыгытын өрөспүүбүлүкэбит Судаарыстыбаннаһын күнүнэн эҕэрдэлиирбин көҥүллээҥ. Ис сүрэхпиттэн махтанабын эрэлгит, итэҕэлгит иһин. Куораты сайыннарыыга саҕалаабыт үлэбитин сайыннаран, кэҥэтэн өрөспүүбүлүкэ бары улуустарыгар ыытыахпыт. Биһиги итини кыайыахпыт, тоҕо диэтэххэ, өрөспүүбүлүкэбит сүрүн баайа-дуола — кини норуота, эһиги буолаҕыт. Саҥа талыллыбыт губернатордары кытары көрсүһүүгэ Бэрэсидьиэн Владимир Путин: «Айсен, эйиэхэ барыта табыллыа диэн эрэнэбин: дойдуҥ баай, дьонуҥ-сэргэҥ талааннаах, туохтан да толлума, инниҥ хоту баран ис», – диэн мээнэҕэ эппэтэ. Туругурдун Саха Өрөспүүбүлүкэтэ, туругурдун биһиги державабыт – улуу Арассыыйа!
Өр-өтөр буолбата, болуоссакка оһуокай саҕаланна. Айсен Николаев бырабыыталыстыба чилиэннэринээн илии-илиилэриттэн ылсан, бар дьоннорун кытары добун түһүлгэни төрүттээтилэр.
Раиса СИБИРЯКОВА, «Саха сирэ» хаһыат, edersaas.ru