Айсен Николаев: «Хоту» научнай үөрэтэр киин бырайыактара аан дойду таһымыгар тахсыахтаахтар»
«Хоту: бигэ сайдыылаах сир-уот» диэн научнай үөрэтэр киин Кэтээн көрөр сэбиэтин мунньаҕа буолан ааста. Мунньаҕы Ил Дархан Айсен Николаев үүннээн-тэһииннээн ыытта. Тэрээһиҥҥэ Камчатка кыраайын күбүрүнээтэрэ Владимир Солодов кытынна.
Мунньахха 2024 сылга диэри ыытыллыахтаах тэрээһиннэр былааннарын сэргэ, научнай-үөрэхтээһин киинин бырайыактарын офиһын тэрийии туһунан боппуруостар көрүлүннүлэр. Маннык тэрийии тустаах бырайыактар көдьүүстээх буолалларын хааччыйыаҕа.
«Научнай-үөрэхтээһин киинин сүрүн сыалынан, тиэмэтинэн килиимэт боппуруостара буолаллар, бу саҕалааһыны дойду салалтата өйүүр. Хомойуох иһин, бары бэркэ диэн билэ-көрө сылдьабыт, килиимэппит олус түргэнник уларыйарын-тэлэрийэрин. Ити уларыйыы араас хабааннаах уустуктары үөскэтэр. Ол иһин, ити боппуруостарга аналлаах саҥа технологиялар тустаах кииҥҥэ өссө үчүгэйдик оҥоһулланнар аан дойду үрдүнэн көдьүүстээх буолаллара ситиһиллиэхтээх», — диэн Айсен Николаев быһааран биэрдэ.
Мунньахха кыттыбыт салайааччылар, учуонайдар «Хоту» научнай үөрэтэр киин бастаан утаа саҥа технологиялары оҥорон, баһылаан, олору федеральнай уонна аан дойду таһымыгар олоххо киллэриигэ этиилэрин, былааннарын билиһиннэрдилэр. Билигин киин бырайыактара биэс анал кластердарга араарылланнар, тустаах үлэ ыытыллар. «Хоту» киин 2019 сыллаахха Саха сиригэр, Сахалиҥҥа, Камчааткаҕа, Магадаҥҥа уонна Чукоткаҕа тэриллибитэ.
edersaas.ru