Айсен Николаев: Хоту дойдуга таһаҕаһы таһыы үбүлээһинэ чопчу буолуохтаах
Бүгүн, балаҕан ыйын 6 күнүгэр, Илиҥҥи экэнэмиичэскэй пуорумҥа хоту улуустарга таһаҕаһы таһыы сокуонун барылын ырытыы туспа көрүлүннэ. Ил Дархан Айсен Николаев бу сокуон хайаатар да үбүнэн-харчынан бигэргэтиллиэхтээҕин, хас биирдии пуун чопчу буолуохтааҕын эттэ.
Айсен Николаев бэлиэтииринэн, билигин оҥоһуллубут сокуон барылын үбүлээһинин боппуруоһа чопчута суох.
— Хоту дойдуга таһаҕаһы таһыы сокуонун бырайыага оҥоһуллубутуттан, биһиги туруорсууларбыт олоххо киирэн эрэллэриттэн тус бэйэм үөрэбин. Ол эрээри мин манна эбии этиилэрдээхпин. Бастатан туран, бу сокуон дьоҥҥо-сэргэҕэ быһаччы туһалаах буолуохтаах. Ол иһин хас биирдии пуун чопчу суруллуохтаах дии саныыбын. Үбүнэн-харчынан бигэргэтиллиэхтээх, оччоҕуна эрэ сокуон үлэлиэҕэ. Саха сиригэр хоту дойдуга, Арктикаҕа таһаҕаһы таһыы тыын боппуруоспут. Икки-үс сыллаах таһаҕаһы эрдэттэн тастахпытына эрэ нэһилиэнньэ олоҕун-дьаһаҕын хааччыйабыт. Манна баран эттэххэ, Дьокуускай куораппытыгар да таһаҕаһы таһыы барыта Хотугу таһаҕаһы таһыыга киирсэр. Тоҕо диэтэргин, күһүн, саас суолбут быстан хаалар. Бу боппуруоһу Өлүөнэ муостатын тутуу, дьиҥэр, түргэнник быһаарыахтаах этэ да, билигин да Үп министиэристибэтин көрүүтүгэр сытар. Иккиһинэн, судаарыстыбаннай мэктиэ диэн баар буолуохтаах. Ити кирэдьиит ыларга көмөлөөх буолуоҕа, — диэр этэр кини.
Сессияҕа Уһук Илин, Арктика сайдыыларын миниистирин бастакы солбуйааччы Гаджимагомед Гусейнов, Судаарыстыбаннай Дуума Уһук Илин, Арктика сайдыытын кэмитиэтин салайааччыта Николай Харитонов, эрэгийиэннэр, хампаанньалар бэрэстэбиитэллэрэ кытыннылар.
Аграфена КУЗЬМИНА