Киин куорат салалтата Ороһооспо өрөбүллэригэр куорат уонна куорат таһынааҕы бөһүөлэктэр санитарнай туруктарын хонтуруоллаата.
Айсен Николаев бу күннэргэ туһааннаах сулууспалар салайааччыларын кытары куорат Гагаринскайдааҕы, Губинскайдааҕы, Октябрьскайдааҕы, Промышленнайдааҕы уокуруктарыгар уонна Марха бөһүөлэгэр сылдьан хомууналынай өҥөнү хааччыйар тэрилтэлэр үлэлэрин итиэннэ элбэх кыбартыыралаах дьиэлэр олбуордарын туругун көрдө-иһиттэ. Салайар хампаанньалар бөҕү-саҕы кэмигэр таһааран иһэр буоланнар, ханна даҕаны бөх наһаа таһынан мунньуллуута суох. Биллэрин курдук, кыһын саҕаланыаҕыттан уулуссалартан, болуоссаттартан күрдьүллүбүт хаар полигоҥҥа илдьиллэр. Ыраастанар уулуссалар ахсааннара быйыл элбэтиллибэтэх эрээри, хаары күрдьүү графига икки төгүл, сорох уулуссаларга үс төгүл суһалсыйбыт. «Водоканал» АУо үлэһиттэрэ Рыдзинскай аатынан уулуссаҕа уу тоҕу барыытыттан үөскээбит муус хайыҥы көйө сылдьаллар, ыраастаан бүттэллэр эрэ, саахалы туоратыыга үлэлиэхтээхтэр.
— Хомунаалынай сулууспа тэрилтэлэрэ Саҥа дьыл бырааһынньыгын кэнниттэн үлэлэрин уһаппакка-кэҥэппэккэ саҕалаабыттар, кэлэр да өттүгэр бу курдук, тэтимнэрин ыһыктыбакка, үлэлииллэригэр эрэнэбин, —— диэн куорат дьаһалтатын баһылыга Айсен Николаев астыммытын биллэрдэ.
Раиса Сибирякова, “Саха сирэ” хаһыат, edersaas.ru.
Уулуссалартан, болуоссаттартан күрдьүллүбүт хаар полигоҥҥа таһыллар