Айсен Николаев: «Хапытаалынай өрөмүөн пуондатын үлэтэ аһаҕас уонна өйдөнөр буолуохтаах»

Өрөспүүбүлүкэҕэ элбэх кыбартыыралаах дьиэлэр хапытаалынай өрөмүөннэрин сүрүннүүр пуонда эрэгийиэннээҕи бырагырааманы олоххо хайдах киллэрэрин Ил Дархан э.т. Айсен Николаев от ыйын 19 күнүгэр мунньах кэмигэр дьүүллэстэ.  

edersaas.ru

Энергетика уонна ОДЬКХ миниистирэ Данил Саввинов этэринэн, билиҥҥи туругунан хапытаалынай өрөмүөн эрэгийиэннээҕи бырагырааматыгар 4 466 элбэх кыбартыыралаах дьиэ киирэр. Онтон 1990, ол эбэтэр 44% мас дьиэ. «Өрөспүүбүлүкэҕэ бырагыраама 4-с сылын үлэлиирин тухары 54 тыһ. киһи олорор 573 элбэх кыбартыыралаах дьиэ өрөмүөннэннэ», — диэн эттэ кини.

Олохтоохтор уонна салайар хампаанньалар өттүлэриттэн өрөмүөн хаачыстыбатыгар ирдэбил уонна үҥсүү киириитин аҕыйатар сыалтан, министиэристибэ типовой бырайыак альбомун оҥоро сылдьар. 2019 с. элбэх кыбартыыралаах дьиэлэр хапытаалынай өрөмүөннэрин сүрүннүүр пуонда 1926 типовой бырайыак оҥорор санаалаах. Өрөмүөн үлэтэ хайдах баран иһэрин кэтииргэ общественнай хонтуруол тэриллиэҕэ.

Айсен Николаев хапытаалынай өрөмүөҥҥэ наадыйар төһө дьиэ баарын чуолкайдыырга, ол ороскуотун чопчулуурга, бырайыагын оҥорорго мунньахха кэлбит профильнай тэрилтэлэргэ сорудах биэрдэ. Ону таһынан, бэйэни салайыныы уорганнарын эмиэ кыттыһыннарар наадалааҕын эттэ.

Хапытаалынай өрөмүөн бырагыраамата олоххо киирэриттэн нэһилиэнньэ олоҕун хаачыстыбата быһаччы тутулуктаах. Ол туһугар хапытаалынай өрөмүөн пуондатын үлэтин хаттаан көрөр наадалааҕын, өрөспүүбүлүкэ олохтоохторугар кинилэр тугунан дьарыктаналлара аһаҕас уонна өйдөнөр буолуохтааҕын Айсен Николаев ыйда. Онуоха үлэ хаачыстыбатын үрдэтэр уолдьаспытын бэлиэтээтэ.

Марианна ТЫРТЫКОВА, «Саха сирэ», edersaas.ru