Айсен Николаев: «Ханнык даҕаны күчүмэҕэй кэмнэргэ тутуу бара туруохтаах!»
Саҥа үөрэх дьыла саҕаланара чугаһаата. Атырдьах ыйын 8 күнүгэр Ил Дархан Айсен Николаев саҥа тутуллубут уонна тутулла сылдьар үөрэх кыһаларын кэрийэн, төһө бэлэмнэрин туоһуласта.
Судаарыстыба уонна чааһынай үбүлээһин холбоһуктаах күүстэринэн 203 микрооройуоҥҥа тутуллубут 315 миэстэлээх уһуйааҥҥа тиийэ сырыттылар. Эрэгийиэн салайааччыта бу тутуу туһунан маннык эттэ:
— Билигин Дьокуускай куоракка 12 социальнай эбийиэк тутуллар, олортон биирдэстэринэн бу элбэх миэстэлээх оҕо уһуйаана буолар. Бу чааһынай үп уонна судаарыстыба кыттыһан туппут иккис уһуйааннара буолар. Дьиэ олус тупсаҕай оҥоһуулаах, эбийиэк туох баар аналлаах тэриллэринэн толору хааччыллыбыт. Балаҕан ыйыгар “Сардаана” диэн кэрэ ааттаах уһуйаан үлэҕэ киириэ диэн эрэнэбит.
Дьокуускай куорат биир ордук сытыы кыһалҕатынан өр сылларга оскуолаларга үөрэх миэстэтэ тиийбэтэ буолар. Суолталаах хамсааһыннар кэнники сылларга эрэ баар буоллулар. Өрөспүүбүлүкэ баһылыга Дьокуускай куорат 5 №-дээх орто уопсай үөрэхтээһин оскуолатын эбии атыылаһыллыбыт дьиэтигэр тиийэ сырытта. Оскуола саҥа дьиэтигэр 580 оҕо үөрэнэ кэлэрэ былааннанар.
— 2018 сыл ахсынньытыгар дойду бэрэсидьиэнин кытта бу кыһалҕа туһунан кэпсэтэ сылдьыбытым. Владимир Владимирович Путин истэн баран, мин этиибин өйөөбүтэ, оскуолаларга анаан эбии дьиэлэри атыылаһарга федеральнай бүддьүөттэн 600 мөл. солк. көрүллүбүтэ. 2019 сыллаахха үп кэлэн, былааннаммыт дьиэлэр атыылаһыллыбыттара, үөрэх кыһатыгар кубулутарга бырайыак оҥоһуллубута. 5-с №-дээх оскуола биир саамай күүскэ туолбут оскуола этэ. Бу күһүн үрдүкү кылаас оҕолоро оскуола саҥа дьиэтигэр үөрэнэ барыахтара. Бу дьиэ толору хааччыллыбыта, бэлэмнэммитэ көстөр. Саҥа үөрэх дьылыгар Арассыыйа бэрэсидьиэниттэн үтүө бэлэх буолла диэххэ сөп.
Кэрийии бүтэһик эбийиэгинэн “Новопортовской” кыбаарталга тутулла турар 240 миэстэлээх уһуйаан буолла. Бу саҥа дьиэ 2021 сыл бүтүүтэ тутуллан бүтэн, толору хааччыллан үлэҕэ киирэрэ күүтүллэр.
— Социальнай эбийиэктэр киин куоракка эрэ буолбакка Саха сирин үрдүнэн тутулла тураллар. Оскуолалар, балыыһалар, уһуйааннар тутуулара тохтуо суохтаах. Ханнык даҕаны күчүмэҕэй кэмнэргэ тутуу барара олус суолталаах, бу өрөспүүбүлүкэбит сайда турарын көрдөрөр — диэтэ Ил Дархан кэрийии түмүгэр.
edersaas.ru