Бэҕэһээ РФ бэрэсидьиэнэ Владимир Путин ыыппыт быһа биэриитигэр Саха сириттэн Үп, экономика коллеһын преподавателэ Михаил Ваганов хамнаһа тохсунньуттан үрдээн баран, муус устарга кэлэн кыччаабытын туһунан иһитиннэрбитэ. Бүгүн Ил Дархан э.т. Айсен Николаев кинини кытары көрсөн кэпсэттэ.
- Бэҕэһээ Айсен Николаев быһа биэрии кэнниттэн тута бырабыыталыстыба бэрэссэдээтэлин, Үөрэх миниистирин ыҥыран кэпсэппитэ. Бүгүн преподаватели бэйэтин кытары көрүстэ. Ол түмүгэр хартыына маннык ойууланан таҕыста.
Колледж преподавателлэрэ сыл бастакы кыбаарталыгар бириэмийэни ый аайы хамнастарын кытары тэҥҥэ ыла олорбуттар. Үлэ дуогабарынан, иккис кыбаарталтан саҕалаан үс ый түмүгүнэн хайдах үлэлээбиттэриттэн көрөн бириэмийэ бэриллиэхтээх эбит.
“Манна хамнас кыччааһына суох. Колледжка хамнаһы төлөөһүн систиэмэтэ уларыйбыт, ону бухгалтерия кэмигэр үлэһиккэ эппэтэх. Ол эрээри Михаил Сергеевич бу боппуруоһу туруорбута сөптөөх. Билигин хамнас чааһыгар социальнай ситимнэргэ үгүс киһи суруйар. Доруобуйа харыстабылыгар маннык кыһалҕа эмиэ турар. Онон бу тиэмэни харахпыт далыгар илдьэ сылдьыахпыт, — диэн иһитиннэрэр Айсен Сергеевич.
Манна сыһыаран эттэххэ, Саха сирэ РФ бэрэсидьиэнэ Владимир Путин 2012 сыллаахха таһаарбыт ыйаахтарыгар олоҕуран, бүддьүөт үлэһиттэрин хамнаһын үрдэтиини түһүмэҕинэн ыыта олорбута. Бу кэнники хамнас былырыын алтынньыга уонна быйыл тохсунньуга үрдээбитэ. Россияҕа биир бастакынан кыра хамнас тиийинэн олоруу алын кээмэйигэр тэҥнэниллибитэ. “Орто анал үөрэхтээһиҥҥэ “ыам ыйын ыйаахтарынан” хамнаһы үрдэтиини 109 % толорон иһэбит. Былааммытын аһары бардыбыт. Билигин хас биирдии үөрэх тэрилтэтэ бириэмийэ, хамнас боппуруоһун бэйэтэ быһаарар, ол үлэ дуогабарыгар суруллар”, — диэн бэлиэтиир үөрэх миниистирэ Владимир Егоров.
Аграфена КУЗЬМИНА, “Саха сирэ” хаһыат, edersaas.ru,
Мария ВАСИЛЬЕВА хаартыскаҕа түһэриитэ.
+1
+1
+1
+1
+1
+1
+1