Сэтинньи 16 күнүгэр Ил Дархан Айсен Николаев Нам улууһун Кириэс-Кытыл сэлиэнньэтигэр тутулла турар оскуолаҕа сырытта. Онно миэстэтигэр тутуу министиэристибэтин, судаарыстыбаннай сакаасчыт сулууспатын, бэдэрээт тэрилтэтин бэрэстэбиитэллэрэ кыттыылаах суһал мунньаҕы ыытта.
— Хамаҕатта нэһилиэгин олохтоохторо оскуола тутуллан бүтэрин олус кэтэһэллэр. Онон тутуу кэмигэр бүтүөхтээх. Тутуу министиэристибэтигэр эбии үп-харчы булан, тутулларын бүтэрин түргэтэллэригэр уонна үлэ хаачыстыбатын кытаанахтык хонтуруоллуулларыгар сорудахтыыбын, — диэн Айсен Николаев эттэ.
Билигин оҕолор биир этээстээх эргэ мас дьиэҕэ үөрэнэ сылдьаллар. Манна Кириэс-Кытыл оҕолоро эрэ буолбакка, чугастааҕы сэлиэнньэлэртэн эмиэ кэлэн үөрэнэллэр.
Саҥа тутулла турар оскуола 220 миэстэлээх, 5 тыһыынча кв.м. иэннээх. Спортивнай саалалаах уонна 50 миэстэлээх интэринээттээх буолар. Маны сэргэ үөрэнэр кылаастар, мэдиссиинэ хосторо, мастарыскыайдар, аактабай саала, лаборантскай, лингафоннай кэбиниэттэр, бибилэтиэкэ, кыһыҥҥы уонна спортивнай саалалар, куукуна, остолобуой үлэлиэхтэрэ.
Хамаҕатта нэһилиэгэр оскуола “Үөрэҕирии” национальнай бырайыак чэрчитинэн тутулла турар.
Ангелина Васильева, “Саха сирэ” хаһыат, edersaas.ru