Айсен Николаев: “Халаан уутугар эмсэҕэлээбиттэргэ ураты болҕомтобутун ууруохпут”
“Быйылгы кыстыкка нэһилиэнньэлээх пууннар бары бэлэм буолуохтара. Бу боппуруоска ордук халаан уутугар эмсэҕэлээбиттэргэ ууруохпут”, – диэн иһитиннэрэр Ил Дархан Айсен Николаев бүгүн РФ бэрэсидьиэнигэр Уһук Илиҥҥи федеральнай уокурукка боломуочуйалааҕа Юрий Трутневы кытары мунньаҕын кэнниттэн.
– Өрөспүүбүлүкэ быйылгы кыстыкка бэлэм буолуоҕа. Бастатан туран, халаан уутугар эмсэҕэлээбит нэһилиэнньэлээх пууннарбытыгар болҕомтобутун ууруохпут. Билигин нэһилиэнньэлээх пууннары чөлүгэр түһэрии бара турар. Ону сэргэ олохтоохтортон сайабылыанньа хомуйуута, кинилэргэ төһө кыалларынан түргэнник көмө кэлиитин олохтооһун бара турар. Билиҥҥи туругунан, 2 мөлүйүөн солкуобай уустук балаһыанньаҕа түбэспит кыра дохуоттаах дьоҥҥо көмө барбыта. Ону таһынан 30 мөл солк. халаан уутугар эмсэҕэлээбит дьоҥҥо көмө быһыытынан көрүлүннэ. Сайабылыанньаларынан бу көмөнү дьон ылан иһиэхтэрэ, – диэн бэлиэтиир Айсен Сергеевич суруналыыстары кытары көрсүһүүгэ.
Санатан эттэххэ, Кэбээйи уонна Дьааҥы улуустарыгар өрүстэр таһымнааннар ыксаллаах быһыы-майгы биллэриллибитэ. Кэбээйи улууһун Сэбээн Күөлэ, Дьааҥыга аҕыс нэһилиэнньэлээх пуун ууга барбыттара. Быйылгыттан саҕалаан көмөнү ылыы судаарыстыбаннай уонна муниципальнай өҥөнү биэрэр портал (“Госуслуги”) уонна “Мин докумуоннарым” элбэх функциялаах киин нөҥүө барыахтаах. Билиҥҥи туругунан, Экология министиэристибэтигэр 3000-тан тахса сайабылыанньа киирдэ. Дьааҥыга докумуоннары хомуйууга “Мин докумуоннарым” киин үлэһиттэрэ анаан-минээн улууска тиийэн үлэлиэхтэрин туһунан Ил Дархан эрдэ бэлиэтээн турар.
Аграфена КУЗЬМИНА