Быйыл Өлүөнэ өрүскэ хас да сиринэн муус харыыта үөскээн, Өлүөхүмэҕэ, Дьокуускайга, Намҥа, Уус Алдаҥҥа дьиэлэр ууга барбыттара. Халаан уутугар эмсэҕэлээбит дьоҥҥо көмө барыаҕын туһунан Ил Дархан Айсен Николаев бүгүн “Саха” НКИХ биэриитигэр ыам ыйынааҕы түмүгү таһаарарыгар бэлиэтээн эттэ.
– Быйыл Өлүөнэ өрүскэ халаан уустуктук ааста. Хас да сиринэн харыы үөскээн, Өлүөхүмэҕэ, Дьокуускайга, Намҥа, Уус Алдаҥҥа барыта 300-тэн тахса дьиэ эмсэҕэлээтэ. Бу халаан уутугар биир да социальнай эбийиэк ууга ылларбата. Сорох сирдэргэ суол быста сылдьыбыта да, ити барыта тута туоратыллыбыта. Билигин миэстэтигэр тахсыбыт хоромньуну ааҕыы бара турар. Хамыыһыйалар түмүк таһаарбыттарынан, эмсэҕэлээбит дьоҥҥо туһааннаах көмө барыаҕа. Уопсай ылан эттэххэ, атын сыллардааҕар быйыл өрөспүүбүлүкэ үрдүнэн өрүстэр улаханнык халааннаабатылар. Халыма өрүскэ балаһыанньа уустук буолуоҕа диэн кэтэспиппит, билиҥҥитэ этэҥҥэ баран иһэр, – диэн иһитиннэрдэ Ил Дархан.
Аграфена КУЗЬМИНА