Айсен Николаев: «Хайа бырамыысыланнаһыгар үлэлиир аныгы исписэлиистэри Нерюнгрига бэлэмниэхпит»
Бүгүн «Профессионалитет» федеральнай бырайыак чэрчитинэн, үөрэтэр-оҥорон таһаарыыга, сир баайын хостуурга аналлаах киини (кластер) тэрийиигэ, сайыннарыыга Нерюнгри оройуонун дьаһалтата, СӨ Үөрэҕин, билимҥэ министиэристибэтэ уонна бырамыысыланнай хампаанньалар бииргэ үлэлииргэ Сөбүлэһиини түһэристилэр.
Ил Дархан Айсен Николаев: «Таас чоҕун бырамыысыланнаһа тэтимнээхтик сайдар, исписэлиистэр ону ситиһэн иһиэхтэрин наада. Биһиги Соҕуруу-Саха сиринээҕи технологическай кэллиэс баазатыгар үөрэх кластерын тэрийэри көҕүлээбиппит уонна ону федеральнай таһымҥа көмүскээбиппит. Тустаах бырайыакка үс сылга барыта 220 мөл. солк. барара быһаарыллыбыта. Бу — матырыйаалынай-тэхиньиичэскэй баазаны бөҕөргөтүөҕэ, исписэлиистэри саҥалыы көрөн үөрэтиигэ көҕүлүөҕэ. Саамай сүрүнэ, Саха сириттэн таас чоҕу хостуур бырамыысыланнаска сыһыаннаах элбэх исписэлиис үөрэнэн тахсарын хааччыйыаҕа», — диэн Айсен Николаев быһааран биэрдэ. Бииргэ үлэлииргэ аналлаах Сөбүлэһии докумуонугар СӨ үөрэҕин миниистирэ Ирина Любимова, Нерюнгри оройуонун баһылыга Роман Щегельняк, «Колмар» ХЭУо генеральнай дириэктэрэ Артем Левин, «Якутуголь» АУо генеральнай дириэктэрэ Иван Цепков, «Эльгауголь» ХЭУо генеральнай дириэктэрэ Инна Лосюк, Соҕурууҥҥу-Саха сиринээҕи технологическай кэллиэс дириэктэрэ Ирина Подмазкова, Алданнааҕы политэхиньиичэскэй тэхиньикуум дириэктэрэ Александр Иванов уонна хайа-геологическай тэхиньикуум дириэктэрин э.т. Кузьма Сыромятников илии баттаатылар.
Андрей Сорокин хаартыскаҕа түһэриилэрэ (СИА)