Бэҕэһээ, Тыйаатыр аан дойдутааҕы күнүгэр, «Хаарыан хампа кытыл” өрөспүүбүлүкэтээҕи 10-с театральнай бэстибээл бириэмийэлэрин туттарыы үөрүүлээх түгэнэ буолла.
edersaas.ru
Былатыан Ойуунускай аатынан Саха тыйаатырыгар бэстибээл түмүктэрин биллэрэр уонна кыайыылаахтары эҕэрдэлиир долгутуулаах киэһээҕэ СӨ Ил Дархана Айсен Николаев кытынна. Айсен Сергеевич Х үбүлүөйдээх бэстибээл Арассыыйаҕа Тыйаатыр сылыгар, оттон кыайыылаахтары биллэрии сиэрэ-туома Тыйаатыр аан дойдутааҕы күнүгэр сөп түбэспитин бэлиэтээтэ.
“Биһиги өрөспүүбүлүкэбит идэлээх тыйаатырдарын ахсаанынан Арассыыйа субъектарын ортотугар инники миэстэлэргэ иһэр. Билигин өрөспүүбүлүкэбитигэр 11 идэлээх уонна улуустарбытыгар 53 норуот тыйаатырдара бааллар. Бу биһиги элбэх талааннаах артыыстардаахпытын, режиссердардаахпытын, туруорааччылардаахпытын, искусство деятеллэрдээхпитин туоһулуур. Оттон өрөспүүбүлүкэ олохтоохторо тыйаатыры олус сөбүлүүллэр”, — диэтэ. Айсен Николаев Саха сирин тыйаатырдарын испэктээкиллэрэ өрөспүүбүлүкэ, Арассыыйа уонна аан дойду кэскиллээх бэстибээллэрин лауреаттарынан буола туралларыгар эрэнэрин биллэрдэ.
“Билигин тыйаатырдарбыт бары сөптөөх дьиэлээх буолбатахтар. Ол гынан баран, бу боппуруоһу сыыйа-баайа салгыы быһаарыахпыт. Тыйаатыр сылыгар тыйаатыр саҥа эбийиэктэрин тутууга хардыылары оҥоруохпут”, — диэн эрэннэрдэ.
Ил Дархан өрөспүүбүлүкэҕэ култуура, тыйаатыр искусствота сайдарыгар ураты кылааттарын, өр сыллаах айар үлэлэрин иһин судаарыстыбаннай наҕараадалары туттарда.
Ол курдук, “СӨ норуодунай артыыһа” бочуоттаах аат СӨ Үүнэр көлүөнэ тыйаатырын артыыһыгар, СӨ үтүөлээх артыыһыгар Петр Андреевка иҥэрилиннэ. Петр Андреев Ньурбатааҕы көһө сылдьар драматическай тыйаатырга 27 сыл үлэлээбитин, онтон билигин СӨ Үүнэр көлүөнэ тыйаатырыгар үлэлии-хамсыы сылдьарын бэлиэтээн туран, тапталлаах кэлэктииптэригэр махталын эттэ.
“СӨ үтүөлээх артыыһа” бочуоттаах ааты Олоҥхо тыйаатырын артыыһа Валентин Исаков уонна Б.Ойуунускай аатынан Саха тыйаатырын артыыһа Ильяна Павлова,
“СӨ култууратын үтүөлээх үлэһитэ” бочуоттаах ааты Бүлүү улууһун Хампа сэлиэнньэтин искусство театральнай оскуолатын дириэктэрэ Николай Ксенофонтов ыллылар.
СӨ култууратын туйгуннарынан ааттаннылар:
Лариса Васильева (С.Зверев-Кыыл Уолун аатынан Үҥкүү тыйаатыра), Екатерина Сорина уонна Евгений Кузьмин ((А.Пушкин аатынан Нуучча драматическай тыйаатыра), Мария Баишева уонна Артем Михайлов (Суорун Омоллоон аатынан Опера уонна балет тыйаатыра), Дмитрий Слепцов (Ньурбатааҕы көһө сылдьар драматическай тыйаатыр), Лена Оленова уонна Владислав Иванов (Олоҥхо тыйаатыра), Павел Ченянов (Саха тыйаатыра), Любовь Макарова (Үүнэр көлүөнэ тыйаатыра) уонна Николай Друзьянов (Эстрада тыйаатыра).
РФ култуураҕа миниистирэ Владимир Мединскэй, РФ Тыйаатырдарын деятеллэрин сойууһун бэрэссэдээтэлэ Александр Калягин бэстибээл уон сыллаах үбүлүөйүнэн эҕэрдэ тэлэгирээмэлэрин аахтылар. Ону сэргэ бэйэлэрин истиҥ эҕэрдэлэрин СӨ култуураҕа уонна духуобунай сайдыыга миниистирэ Юрий Куприянов, миниистири солбуйааччы Владислав Левочкин, СӨ Тыйаатырдарын деятеллэрин сойууһун бэрэссэдээтэлэ Айаал Аммосов уо.д.а. тиэртилэр, тустаах наҕараадалары туттардылар. Юрий Куприянов Саха тыйаатыра уонна Ньурбатааҕы көһө сылдьар драматическай тыйаатыр гостуруолларга анаан оптуобус атыылаһалларыгар сэртипикээт туттарбытыгар саала иһэ күүстээх ытыс тыаһынан биһирэбилин биллэрдэ.
Салгыы “Хаарыан хампа кытыл” бэстибээл номинаннарын уонна кыайыылаахтарын билиһиннэрии умнуллубут түгэнэ тосхойдо.
Надежда ЕГОРОВА, “Саха сирэ” хаһыат, edersaas.ru