Айсен Николаев: «Хаарбах дьиэлэри көтүрүүнү, тэлгэһэлэри ситэри тэрийиини түргэтэтиэххэ наада»

Хаарбах туруктаах уонна эргэрбит дьиэлэртэн көһөрүү өрөспүүбүлүкэтээҕи бырагырааматын чэрчитинэн биэс сыл иһигэр 146 хаарбах туруктаах мас дьиэттэн көһөрүү оҥоһуллубут. 2019 сыллаахха бырагырааманан олохтоох дьаһалта сэттэ эргэрбит тутуунан киирбит.

Бөһүөлэккэ кураанах турар эргэрбит дьиэлэри көтүрүү, бөһүөлэк иһин тупсарыы боппуруоһа сытыытык турар. Олохтоохтор улахан тутуулар барбыттарын кэннилэриттэн бөһүөлэк иһигэр суолу-ииһи чөлүгэр түһэрии наадатын туһунан эттилэр: «Улахан ыйааһыннаах массыыналар тохтоло суох сырыыларыттан, бэл, оҕо кэлээскэтэ да сатаан сылдьыбат гына суолбут алдьанна», — диэтилэр.

«Сылын ахсын 15-20 диэри эргэрбит иччитэх дьиэ көтүрүллэр, үлэ кээмэйин улаатыннаран биэрэр кыаллар», — диир бөһүөлэк аҕа баһылыга Станислав Бугдуев. Бүгүҥҥү күҥҥэ 50-тан тахса быраҕыллыбыт дьиэ көтүрүллүбүт. Олохтоох былаас былаанныырынан эргэ уонна хаарбах иччитэх дьиэлэр биэс сыл иһинэн көтүрүллэн бүтэллэрэ былааннанар. Өрөспүүбүлүкэ өйөөн үп-харчы көрдөҕүнэ үлэ икки төгүл түргэтиэн сөбүн эттилэр.

Элбэх кыбартыыралаах аҕыс дьиэ тэлгэһэтин тупсарыы боппуруоһа сытыытык турар. Тутууну ыыппыт «Созвездие», «Вита» уонна «Горизонт-Е» ХЭУо тэлэгэһэни тупсарыыга эбээһинэстэрин толорботохторун,  кэккэ биричиинэлэринэн тутуу хампаанньалара итэҕэс-быһаҕас үлэлэрин ситэрэр кыахтара суоҕун туһунан этиннилэр.

Ил Дархан Айсен Николаев олохтоох дьаһалта бэрэстэбиитэллэригэр:»Элбэх кыбартыыралаах дьиэлэр тэлгэһэлэрин оҥорууга, тупсарыыга үп-харчы көстүөҕэ, оттон эһиги тутааччылары кытары быһаарсыыгытын эмиэ түмүктүүр кэмҥит уолдьаста», — диэн көрсүһүүнү түмүктээтэ.