Айсен Николаев хаан туттарар донордар Аан дойдутааҕы күннэригэр кыттыста

Бэс ыйын 14 күнэ — хаан туттарар донордар  Аан дойдутааҕы күннэрэ. Арассыыйаҕа бу күҥҥэ анаан, хаан туттарыытын нэдиэлэтэ саҕаланна.

Доруобуйа харыстабылын эйгэтигэр үлэлиир дьон этэллэринэн, хаан уонна хаантан оҥоһуллар препараттар куруутун тиийбэттэр, онон хаан туттарыы улахан суолталаах. Билигин, ордук, пандемияттан сылтаан хаан туттарааччы ахсаана аҕыйаабыт. Онон бу боппуруос өссө сытыырхайбыт. 

Арассыыйаҕа хаан туттарыытын нэдиэлэтэ үүммүтүнэн, бүгүн Саха сиригэр бу хамсааһын эмиэ саҕаланна.  Маҥнайгы туттарааччылар ортолоругар өрөспүүбүлүкэ аҕа баһылыга Айсен Николаев баар. Кини өрөспүүбүлүкэ олохтоохторун бу аахсыйаҕа кыттарга ыҥырда.

Хаанын чэгиэн доруобуйалаах, 18 сааһын туолбут Арассыыйа гражданина бэйэтин сөбүлэҥинэн туттарыан сөп. Манна пааспар, СНИЛС уонна ФЛГ ыспыраапката ирдэнэр. Атын анаалыстар миэстэтигэр оҥоһуллаллар.

Егор Карпов, «Саха сирэ» хаһыат, edersaas.ru

Хаартыска: СИА