Айсен Николаев: «Хааччахтыыр сорох дьаһаллары устуу иккис түһүмэҕин саҕалыыр туһунан ыйаахха илии баттаатым»

Бүгүн сарсыарда 11 чааска Ил Дархан Айсен Николаев коронавирус туругун туһунан ыыппыт брифинигэр сарсыҥҥыттан хааччахтыыр сорох дьаһаллары устуу иккис түһүмэҕэ саҕаланарын туһунан эттэ.

edersaas.ru
Ааспыт сууккаҕа өрөспүүбүлүкэ үрдүнэн 44 киһи дьаҥа хаптарбыта биллибит. Итинтэн 33 киһи киин куорат олохтоохторо буолаллар, 5 киһи Мэҥэ Хаҥаласка, 4 киһи Нерюнгрига, кэккэ улуустарга биирдиилээн ыалдьыбыттар.

Айсен Николаев кэнники күннэргэ саҥа ыалдьар дьон ахсаана аҕыйаан, 40-50 буолан, өрөспүүбүлүкэҕэ балаһыанньа көнөн, бигэтийэн эрэрин бэлиэтээтэ. Дьаҥ тарҕаныытын коэффициена 0,7-0,8 тиийдэ, ити дойдуга намыһах көрдөрүү буолар. Өрөспүүбүлүкэтээҕи Роспотребнадзор сулууспата киллэрбит этиитигэр Арассыыйа Роспотребнадзора сөбүлэстэ. Онон от ыйын 2 күнүттэн  өрөспүүбүлүкэҕэ хааччахтыыр сорох миэрэлэри устуу иккис түһүмэҕин саҕалыыр туһунан ыйаахха илии баттаатым. Арҕах ыарыылаах дьонтон уонна 65-тэриттэн аҕа саастаахтартан уратыларга толору изоляцияланыы эрэсиимэ холкутуйар. Айхалтан уонна Удачнайтан ураты нэһилиэнньэлээх пууннарга саҥа кэлэр дьоҥҥо икки нэдиэлэлээх изоляцияланыы тохтотуллар. Атыы-эргиэн кииннэрэ (фуд-корда, оонньуур былаһааккалара суох), мусуойдар, библиотекалар, сайыҥҥы кафелар, туристическай баазалар, сынньалаҥ баазалара, пляжтар үлэлииллэрэ көҥүллэнэр. Ол эрээри, маасканы кэтиини, санитарнай-эпидемиологическай миэрэлэри, ирдэбиллэри салгыы тутуһар ирдэнэр диэтэ.

— Салгыы балаһыанньа өссө көнөн, дьаҥҥа саҥа хаптарбыт дьон ахсаана аҕыйаан истэҕинэ, аны икки нэдиэлэнэн, хааччахтыыр миэрэлэри устуу үһүс түһүмэҕэр киириэхпит. Ити эрээри, өрөспүүбүлүкэ олохтоохторо билигин даҕаны холкутуйарга эрдэтин өйдүүллэригэр ыҥырабын. Дьаҥы утары охсуһуу салҕанар, ИВЛ аппараатыгар холбоммут, ыарахан туруктаах ыарыһах аҕыйаҕа суох, стационарнай балыыһаларга 180 киһи сытан эмтэнэр. Ирдэбили бары биир киһи курдук тутустахпытына, дьаҥтан босхолонуохпут, – диэн Ил Дархан брифини түмүктээтэ.  

Раиса Сибирякова, «Саха сирэ»хаһыат,  edersaas.ru