Саха сирин баһылыга Айсен Николаев бүгүн, олунньу 19 күнүгэр, коронавируһунан хааччахтыыр миэрэлэри сымнатар туһунан Ыйаахха илии баттаата. Ол курдук, атыы-эргиэн павильоннара көннөрү эрэсииминэн үлэлиэхтэрэ, амбулаторнай киин бэйэтин үлэтин түмүктээтэ, онон сотору кэминэн спортивнай күрэхтэһиилэр саҕаланыахтара. Бу туһунан Айсен Николаев социальнай ситимнэртэн быһа эпиир кэмигэр иһитиннэрдэ.
Ил Дархан омикроҥҥа сутуллуу өрөспүүбүлүкэҕэ, ордук Дьокуускайга аччаабыта көстөр диэтэ. Бүгүн тыһыынчаттан тахса киһи ыалдьыбыта бэлиэтэммит.
«Ол иһин бүгүн уочараттаах Ыйаахха илии баттыыр кыахтанным. Биһиги соторутааҕыта эрэ Дьокуускайга эргиэн павильоннара үлэлэрин тохтотон, дезинфекцияны ыыталларын ирдээбиппит. Билигин ити ирдэбили уһулабыт, эргиэн эбийиэктэрэ көннөрү эрэсииминэн үлэлиэхтэрэ. Ол гынан баран, биллэн турар, үлэ бэрээдэгинэн хайаан да сууйуу-сотуу үлэлэрэ ыытыллыахтаахтар. Итиэннэ тэйиччиттэн үлэлиэхтээх дьон ахсаанын аҕыйаттыбыт. Урут 50 % этэ, билигин ону 30 %-ҥа диэри намтатабыт», — диэн бэлиэтээтэ Айсен Николаев.
Ону таһынан Айсен Сергеевич федеральнай суһал ыстаап быһаарыытынан ИФА анаалыһы туттарар кыах баар буолбутун эттэ. Киһи официальнайдык ыалдьыбыта бигэргэммэккэ гынан баран анаалыһын түмүгэр антитела баара билиннэҕинэ, QR-куод ылар кыахтанар. Олунньу 21 күнүттэн бу өҥөнү оҥоруу саҕаланыаҕа.
Айсен Николаев өрөспүүбүлүкэҕэ ыарыы намтаабытыгар, дьон үтүөрбүтүгэр миэдиктэргэ махтанна. Итиэннэ «Триумф» успуорт комплексыгар тэриллибит амбулаторнай киин олунньу 19 күнүнэн үлэтин түмүктүүрүн иһитиннэрдэ. Бүтэһик күннэргэ манна сууккаҕа 100-тэн аҕыйах киһи сылдьыбыт. Билигин онно дезинфекция буола турар. Оптуорунньуктан комплекс уруккутун курдук үлэлиэҕэ, күрэхтэһиилэр ыытыллыахтара.