Айсен Николаев Хаҥаласка «Умнас» суолун оҥороочуларга сырытта

Ааптар: 
Бөлөххө киир:

Хаҥалас улууһугар «Куттала суох уонна хаачыстыбалаах суоллар» национальнай бырайыагынан, өрөспүүбүлүкэ таһымнаах «Умнас» айан суолун Покровскайтан Мохсоҕоллооххо диэри учаастага оҥоһуллар.

edersaas.ru

Бүгүн Айсен Николаев үлэ хайдах баран иһэрин билистэ. Тырааныспар уонна суол хаһаайыстыбатын миниистирэ Владимир Сивцев иһитиннэрбитинэн, 16 километр усталаах суол учаастага өрөмүөннэниэхтээҕиттэн билигин 3 километр ситэриллэрэ хаалбыт. Бэдэрээдчик «Автодор» РИК АУо быйыл үлэни түмүктүүр соруктаах үлэлии-хамсы сылдьар.

«Умнас» суолугар кэлиҥҥи үс сыл устатыгар 60 километрдаах суол оҥоһулунна, ону таһынан нэһилиэнньэлээх пууннарга диэри 16 километр суол сөргүтүлүннэ. Бу сыалга 1,5 млрд солк көрүллүбүтэ. Кэлэр сылларга сыл ахсын 13 километртан итэҕэһэ суох суолу оҥорого соруктанабыт, – диэтэ миниистир.

Айаҥҥа куттал суох буолуутун хааччыйан, кэккэ нэһилиэнньэлээх пууннарга уулусаны сырдатыы оҥоһуллубут. Үлэ кыраапык быһыытынан, технология ирдэбиллэрин толору тутуһан баран иһэр. Суолу өрөмүөннээһиҥҥэ тымныы регенерация ньымата туһаныллар, суол эргэ болотуната сиэмэҥҥэ булкуйуллан, саҥа аспаалы кутарга олох буолар.

Владимир Сивцев быйылгыттан Тумултан Тиит Арыыга диэри 12 километр усталаах суол бырайыага оҥоһулларын, тутуута чугастааҕы сылларга саҕаланыахтааҕын эттэ.

Айсен Николаев «Куттала суох хаачыстыбалаах суоллар» национальнай бырайыагынан, былырыын «Кэбээйи» суол оҥоһуллубутун, быйыл «Умнас» суола оҥоһулларын бэлиэтээтэ.

Санатан эттэххэ, «Куттала суох уонна хаачыстыбалаах суоллар» национальнай бырайыак чэрчитинэн, «Саха Өрөспүүбүлүкэтигэр 2020-2024 сс. тырааныспар комплексын сайыннарыы» бырагырааманан былырыын «Умнас» суол Өктөм сэлиэнньэтигэр диэри учаастага оҥоһуллубута. Биэс турба уларытыллыбыта, сир болотуната кэҥэтиллибитэ итиэннэ аспаал алларааҥҥы бүрүөһүнэ, үөһээҥҥи сабыыта кутуллубуттара диэн Ил Дархан уонна Бырабыыталыстыба пресс-сулууспата иһитиннэрэр.

Раиса Сибирякова, «Саха сирэ» edersaas.ru

Андрей Сорокин (ЯСИА) хаартыскаҕа түһэриилэрэ

+1
0
+1
0
+1
0
+1
0
+1
0
+1
0
+1
0