Саха сирин Ил Дархана Айсен Николаев Дьокуускайга Арассыыйа Бэрэсидьиэнин приемнайыгар дьону кытта көрсөн, судаарыстыба баһылыгын уонна регион салайааччытын аадырыстарыгар киирбит ыйытыыларга хоруйдаата.
Бастакынан, Саха сирин баһылыгын кытта видеокэмпириэнсийэ режиминэн Томпо оройуонун олохтооҕо Роза Зелепухина кэпсэттэ. 2017 сыллаахха кини дьиэтигэр уотун араарбыттар. Дьахтар Охотскай Перевоз бөһүөлэгэр гидрометеорология уонна тулалыыр эйгэни кэтээн көрүү федеральнай сулууспатын метеоыстаансыйатын полигонугар олорор. Урут Росгидромет дизельнэй ыстаансыйата уотунан хааччыйар этэ.
Бу туһунан истэн баран Айсен Николаев түргэнник уот ситимин чөлүгэр түһэрэллэригэр сорудахтаата. Сорудах туолуутун регион баһылыга бэйэтэ хонтуруоллуоҕа.
Нерюнгри оройуонун олохтооҕо Владислав Макаров Хани бөһүөлэгэр мэдиссиинэ көмөтүн боппуруоһун таарыйда. 669 киһи олорор нэһилиэнньэлээх пуунугар маннык көмө тэриллибэт. Маныаха “Арассыыйа тимир суоллара” хампаанньа амбулаторияны саппыта төрүөт буолбут.
Бу гражданин ыйытыытыгар Саха сирин Ил Дархана бүгүн дьиэни өрөспүүбүлүкэ бас билиитигэр, онтон муниципалитекка биэрии ыытылларын эттэ. Дьэ, ол түмүктэннэҕинэ, манна Нерюнгри оройуонун киин балыыһатын амбулаторията чугастааҕы кэмҥэ аһыллыаҕа.
Дьокуускайтан килиэп астааһынынан дьарыктанар урбаанньыт Алексей Чернышов кэлэ сырытта. Кини социальнай-үлэ уопсастыбатын тэрийиигэ уонна килиэби астыыр саҥа комплексы оҥорууга, православнай таҥара дьиэтигэр көмөлөһөргө көрдөстө.
Өрөспүүбүлүкэ баһылыга Дьокуускай баһылыгар предпринимательство уонна туризмы сайыннарыыга министиэристибэни кытта бу киһиэхэ дьоҕус биисинэһин өйүүллэригэр эттэ.
Саха Өрөспүүбүлүкэтин Ил Дарханын уонна бырабыыталыстыбатын пресс-сулууспата