Айсен Николаев Госсэбиэт тырааныспарка мунньаҕар массыына суолларынан сылы эргиччи сырыы боппуруоһун туруорда
Саха сирин баһылыга Айсен Николаев дойду Бэрэсидьиэнэ Владимир Путин салайан ыыппыт Госсэбиэт Президиумун “Тырааныспар” хайысхатынан мунньаҕар кытынна. Мунньах тиэмэтинэн 2035 сылга диэри барыллаах 2030 сылга диэри Арассыыйа тырааныспарка саҥа стратегиятын торумнааһын буолар.
“2035 сылга диэри тырааныспар сайдыытын стратегията дьон наадыйыытыгар олоҕуран саҥалыы оҥоһулунна. Үгүс саҥа чахчылар баар буоллулар, холобура, Биир кэлим тырааныспар тирэх тиһигэ, Хотугу муора суолун, аэропуорт инфраструктуратын сайыннарыыга сыһыан уонна барытыгар бу уларыйыылар биһиги өрөспүүбүлүкэбит сиригэр-уотугар сыһыаннаахтар. Мин дойдубутугар уонна чуолаан, Саха сиригэр дьоһун суолталаах диир икки боппуруоһунан кытынным. Балары Стратегияҕа уонна бу Стратегияны олоххо киллэриигэ эмиэ сытыырхатыахха”, — диэн Саха сирин баһылыга бэлиэтээтэ.
Бастакы тиэмэ – 2030 сылга диэри дойду бары массыына суолларынан сылы эргиччи сырыыны хааччыйыы. Айсен Николаев Саха сиригэр бары үс федеральнай суоллар – “Өлүөнэ”, “Халыма” уонна “Бүлүү” – Өлүөнэни, Бүлүүнү уонна Алданы туоратар муосталар суохтарыттан 5 ый устата үлэлиир кыахтара суох. Онон сибээстээн, Стратегия дойду тырааныспар өттүнэн сибээһин хааччыйар сыалы туруорар – маны, туох-ханнык иннинэ, федеральнай массыына суолларыгар хааччыйыахха.
Айсен Николаев таарыйбыт иккис тиэмэтэ – дьоҕус авиацияны сайыннарыы. Саха сирин баһылыгын саныырынан, дьоҕус авиация полярнай эргимтэ иһинээҕи сиргэ-уокка тиийиигэ олус наадалаах. Онон эрэгийиэн иһинээҕи маршруттарга көтүү куттала суох буолуутун хааччыйар туһуттан дьоҕус авиация паркатын элбэтиэххэ.
Владимир Путин Госсэбиэт мунньаҕар тыл этэригэр эрэгиийэн маршруттарын тиһигин кэҥэтэн, дьоҕус авиациянан көтүүнү быдан тиксимтиэ оҥоруохха сөп диэтэ.
Мунньахха федеральнай уонна эрэгийиэн былаастарын бэрэстэбиитэллэрэ, судаарыстыбаннай уонна кэтэх хампаанньалар салайааччылара кытыннылар.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
РФ Бэрэсидьиэнин уонна СИА пресс-сулууспатын хаартыската
Бэлэмнээтэ Женни Стрюкова