Айсен Николаев Госсэбиэт президиумун үөрэхтээһиҥҥэ уонна наукаҕа мунньаҕар кыттынна
Саха сирин баһылыга Айсен Николаев олунньу 6 күнүгэр Кириэмил Улахан дыбарыаһыгар Судаарыстыбаннай сэбиэт уонна РФ Бэрэсидьиэнин иһинэн наукаҕа уонна үөрэхтээһиҥҥэ сэбиэтин холбоһуктаах киэҥ ыҥырыылаах мунньаҕар кытынна.
edersaas.ru
Дойду бэрэсидьиэнэ Владимир Путин бэрэссэдээтэллээх мунньах эрэгийиэннэр экэниэмикэ уонна социальнай эйгэ каадырдарын бэлэмнээһиҥҥэ оруолларын үрдэтиигэ ананна.
Икки күннээх мунньах ыытыллыан иннинэ губернатордар уонна эрэгийиэннэр баһылыктара бөлөхтөргө арахсан, дойдуга науканы, орто идэтийбит уонна үрдүк үөрэҕи сайыннарыыга бырайыактары уонна этиилэри торумнаатылар.
Айсен Николаев РФ наукаҕа уонна үрдүк үөрэхтээһиҥҥэ миниистирэ Валерий Фальковы, Иваново, Новгород, Рязань уонна Тамбов уобаластарын губернатордарын кытта үрдүк үөрэхтээһин тиһигин тупсарыыга этиилэри бэлэмнээтилэр.
Мунньаҕы арыйарыгар Владимир Путин бүгүн ыччат бэйэтин олоххо миэстэтин булунарыгар саҥа усулуобуйалар, олох уонна үөрэх аныгы стандартара наадаларын бэлиэтээтэ. “2021 сылтан саҕалаан, сыллата бүддьүөт миэстэтин ахсаанын элбэтиэхпит уонна эрэгийиэннэргэ үрдүк үөрэх кыһаларыгар уонна, туох-ханнык иннинэ, аныгы, эдэр уонна кэскиллээх каадырдарга наадыйар эрэгийиэннэргэ биэриэхпит. Уопсайа бу сыалга анаан түөрт сыл устата эбии 70 млрд солкуобайы ыытыахпыт”, — диэтэ дойду баһылыга.
Кини маны сэргэ РФ Бырабыыталыстыбатыгар идэтийбит уонна атын нацбырайыактары туһанан эрэгийиэннэргэ үрдүк үөрэх бүттүүн тиһигин саҥардыыга кэлимсэ миэрэлэри олоххо киллэрэллэригэр эттэ. Бу үлэ инфраструктураны сайыннарыы, куораттары, сирдэри-уоттары тупсаҕай оҥоруу, саҥа оҥорон таһаарыныы саҕалааһыны уонна инвестиционнай бырайыактары хабыаҕа.
Маны сэргэ Госсэбиэт мунньаҕын кыттыылаахтара орто идэтийбит уонна үрдүк үөрэх кыһалара эрэгийиэннэрин экэниэмикэлэрин ирдэбиллэригэр сөп түбэһиилэрин, дойду өйүн-билиитин кыаҕын харыстыыр уонна сайыннарар туһуттан үөрэх уонна наука тэрилтэлэрин, араас таһымнаах былаас уорганнарын уонна үлэни биэрээччилэр хардарыта бииргэ үлэлээһиннэрин саҥа ньымаларын туһаныыны олохтооһун наадатын эттилэр.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова