Айсен Николаев: Горнайга баһаары умуруорууга ардах түспүтэ уонна утары уот ыытыллыбыта көмө буолла
Билиҥҥи туругунан, Горнай улууһугар 12 сиргэ ойуур баһаарын умуруоруу бара турар, ордук Өрткө, Маҕараска уонна Күөрэлээххэ баар баһаардар сүрүн болҕомтону ирдииллэр. Бэҕэһээ Ил Дархан Айсен Николаев баһаары умуруоруу хайдах баран иһэрин билсэ Күөрэлээххэ сырытта.
Айсен Сергеевич билигин өрөспүүбүлүкэ үрдүнэн Горнай улууһугар баар баһаардар улахан болҕомтону ирдииллэрин эттэ. Билиҥҥи туругунан, Маҕараска сүрүн күүс туһаайыллыбыт. Манна икки сиринэн улахан баһаар бара турар.
“Билигин сүрүн күүс бу баһаардары бохсууга бара турар. Булууктааһын, утары уот ыытыы үлэлэрэ ыытыллаллар. Ол иһин Дьокуускайга бу күннэргэ буруолаах. Бу нэдиэлэҕэ Горнайга баар баһаардары умуруорар сорук турар”, – диэн бэлиэтиир Айсен Сергеевич.
Санатан эттэххэ, улууска бу нэдиэлэҕэ хас да сиринэн улахан баһаардар турбуттара. Маҕараһы таһынан Күөрэлээххэ, Аһымаҕа, Бэс Күөлүгэр, Өрткө, Маалтааныга ойуур баһаардара бааллар.
“Күөрэлээххэ баһаары умуруоруу былаан быһыытынан бара турар. Утары уот ыытыллыбыта тута биллибит, бүгүн Ааһыма диэки уот барыыта тохтообут. Бу күннэргэ маны умуруорууга күүстээх үлэ барыаҕа. Ону таһынан дьону, тиэхиньиэкин сааһылаан Бэс Күөлүгэр, Өрткө, Кэптиҥҥэ ыыттыбыт. Бу сирдэргэ аҕыйах хонук иһигэр уот туруута аҕыйаабытын иһин, эмиэ киһи болҕомтотун ирдиир баһаардар бара тураллар”, – диэн бэлиэтиир Ил Дархан.
Санатан эттэххэ, от ыйын 20 күнүттэн Горнай, Үөһээ Бүлүү, Ньурба, Томпо, Уус Маайа о.д.а.улуустар эҥэр анал сөмөлүөттэр көтөн, ардаҕы түһэрдилэр. Онон ойуурга баһаары умуруоруу быдан түргэтээбит. Ону сэргэ өрөспүүбүлүкэ үрдүнэн баҕа өттүнэн көмөлөһөөччүлэр баһаарга кыттыһаннар төһүү буоллулар. Холобур, Горнай улууһугар күннэтэ 600-700 киһи, 100 тиэхиньикэ үлэлиир.
Аграфена КУЗЬМИНА, “Саха сирэ” хаһыат, Андрей СОРОКИН хаартыскаҕа түһэриитэ