Айсен Николаев Горнай улууһун баһылыгын кытта көрүстэ

Ааптар: 
Бөлөххө киир:

Ил Дархан Айсен Николаев Горнай улууһун баһылыга Никита Андреевы кытта көрүстэ.

Кэпсэтиигэ Горнай улууһугар сүөһү аһылыгын бэлэмнээһин, социальнай гаастааһын, социальнай эбийиэктэри тутуу боппуруостара таарыйылыннылар. Никита Андреев этэринэн, былырыыҥҥы баһаар содулуттан уонна быйыл элбэх ардахтаах сайын буолан, улуус оттуур ходуһаларыттан 40 %-на уу анныгар хаалбыт, ону таһынан тиэйиигэ уонна хаһаайыстыбалары көһөрүүгэ туспа ыарахаттары көрсүбүттэр. Ол да буоллар, былааннаммыт от 20 %-нын чөкөтөн, былырыыҥҥытааҕар лаппа ордук көрдөрүүлээх иһэллэр. «Улууспутугар кыһыны туоратар оту бэлэмнииргэ кыһаллыахпыт», — диир улуус баһылыга Никита Андреев.

Ил Дархан Айсен Николаев улууска социальнай гаастааһыҥҥа былаантан хаалбат туһугар болҕомотону уурарга сорудахтаата. Тыа сирин кэлимник сайыннарыы бырагырааматынан Горнайга тыһыынчаттан тахса уһаайбаҕа гаас ситимэ тиэрдиллибит. Билигин нэһилиэктэр дьаһалталарын кытта тиэрдиллибит ситимҥэ  дьиэлэри холбуур үлэ тэтимнээхтик ыытыллыахтааҕа этилиннэ. Манна СӨ үлэҕэ уонна бырамыысыланнаска министиэристибэлэриттэн анал көмө ирдэнэр. Чуолаан, кыаммат ыалларга дьиэлэригэр гаас тардыытыгар үбүнэн көмө көрүллүөхтээх.

Улууска саҥа социальнай эбийиэктэри тутуу боппуруостара көрүлүннүлэр. РФ Бэрэсидьиэнин Уһук Илиҥҥэ боломуочуйалааҕа  Юрий Трутнев көмөтүнэн Горнай улууһун Бэс Күөлүгэр элбэх хайысхалаах спортивнай комплексы тутууну үбүлээһин боппуруоһа быһаарылынна. Бырайыагы олоххо киллэриигэ барыта 430 мөл солк. көрүллүөҕэ, итинтэн 395 мөл солк. федеральнай бүддьүөттэн тыырыллыаҕа. Ити үптэн 100 мөл солк. өрөспүүбүлүкэ тустаах үлэни  быйыл тэрийбитинэн барыаҕа. Бырайыак быһыытынан саҥа тутууга култуура киинэ, бибилэтиэкэ, спортивнай саала, почта, уопсастыбаннай тэрилтэлэргэ анаммыт уонна нэһилиэк дьаһалтатын дьиэлэрэ киирэллэр. Быйыл от ыйыгар нэһилиэккэ 150 миэстэлээх саҥа оскуола тутуута саҕаламмыта. Үөрэх тэрилтэтэ аныгы үөрэх тэриллэринэн, компьютерынан, интерактивнай дуоскаларынан толору хааччыллыаҕа.

+1
0
+1
0
+1
0
+1
0
+1
0
+1
0
+1
0