Быйыл 60 нэһилиэнньэлээх пуун халаан уутугар ылларда. Халаан содулун туоратыыга федеральнай бүддьүөттэн 587 мөл. солк. кэлбитэ. “Өрөспүүбүлүкэбит халаан содулун туоратыыга федеральнай көмөнү бу бастакытын маннык эрдэ ылла”, — диэн бэлиэтиир Ил Дархан э.т. Айсен Николаев “Саха” НКИХ ханаалыгар быһа эфирин кэмигэр.
Бу нэдиэлэҕэ Айсен Николаев Москваҕа РФ бэрэсидьиэнэ Владимир Путины кытары көрсүбүтэ. Көрсүһүү кэмигэр үөрэх эйгэтиттэн саҕалаан суол-иис, халаан содулун туоратыыга тиийэ боппуруостар таарылыннылар.
“Владимир Путин өрөспүүбүлүкэбит сайдыытын, кыһалҕатын туһунан элбэҕи ыйытта. Ол иһигэр өрөспүүбүлүкэҕэ биллэриллибит ыксаллаах быһыы-майгы, тырааныспар, суол-иис, Өлүөнэ өрүһү туоруур муоста, Бүлүү федеральнай суол тустарынан. Бэрэсидьиэн туһааннаах министиэристибэлэргэ, биэдэмистибэлэргэ соруктары биэрбитэ”, — диэн бэлиэтиир РФ бэрэсидьиэнин кытары көрсүһүүтүһн туһунан.
Санатан эттэххэ, Саха сирин салалтата үгүс нэһилиэнньэлээх пуун сааскы халаан уутугар ылларбытынан федеральнай таһымҥа ыксаллаах быһыы-майгы биллэриллибитин кэннэ, халааҥҥа ылларбыт дьоҥҥо көмөнү биэриигэ федеральнай киини кытары ыкса үлэлэһэн барбыта. Ил Дархан э.т. Айсен Николаев биир бастакынан Ыксаллаах быһыы-майгы, Үп миниистирдэрин кытары көрсөн, көмө харчы кэмигэр кэлэрин быһаарсыбыта. Ол түмүгэр Саха сирэ 587 мөл. солк. ылбыта.
“Федеральнай былааһы кытары үлэлэһэрбит хайаатар да наада. Халаан содулун туоратыыга Саха сирэ федеральнай бүддьүөттэн 587 мөл. солк. ылла. Өскөтүн бу иннинэ көмө Саҥа дьыл иннинэ кэлэр эбит буоллаҕына, быйыл Саха сирэ бастакытын бу маннык эрдэ ылла. Федеральнай киини кытары салгыы да маннык үлэлэһиэхпит”, — диэн бэлиэтиир Айсен Сергеевич.
Аграфена КУЗЬМИНА, “Саха сирэ” хаһыат.