Айсен Николаев федеральнай ханаалга ойуур баһаардарын балаһыанньатын кэпсээтэ
Айсен Николаев федеральнай ханаалга ойуур баһаардарын балаһыанньатын кэпсээтэ.
РБК федеральнай ханаал “Что это значит?” (ЧЭЗ) иһитиннэрэр-кэпсиир биэриитин уочараттаах эфирин кэмигэр Сибиир уонна Уһук Илин сиригэр-уотугар ойуур баһаардарын тиэмэтин таарыйдылар. Эрэгийиэн айылҕа иэдээнин утары, ол иһигэр хонтуруолланар зонаҕа эмиэ, хайдах туруулаһарын туһунан Саха сирин Ил Дархана Айсен Николаев кэпсээтэ.
“Хонтуруолланар зонаҕа суоһуур уонна итилэри умулларар кыаллыбат буолбут ойуур бары баһаардарын туһунан маннык өйдүүр сөптөөх: бу умайыылар тэнийэн, нэһилиэнньэлээх пууннарга уонна бырамыысыланнас эбийиэктэрин үлэлэригэр улахан кутталы үөскэтэллэр. Уот, сибээс линиялара уокка былдьаналлар. Биһиги маннык көстүүгэ өрүү түбэһэбит уонна үөһэттэн, сөмөлүөттэн кэтээн көрөн, кыах-күүс тиийэринэн умуллара сатыыбыт. Оттон баһаар сүүһүнэн тыһыынча гектардаах сиргэ-уокка тэнийдэҕинэ, ханнык да тиэхиньиичэскэй күүһүнэн умулларар кыаллыбат”, — диэтэ өрөспүүбүлүкэ баһылыга.
Саха сирин ойуурдарыгар турбут баһаардары умулларыыны Айсен Николаев тус хонтуруолугар ылла. Атырдьах ыйын 1 күнүнээҕи туругунан, өрөспүүбүлүкэҕэ уопсайа 1431,00 гектар иэннээх тыа 20 баһаарын умулларыыга үлэ ыытыллар. Алта баһаар салгыы тэнийэрэ бохсулунна, 699 киһи умуруора сылдьар, маныаха 625 тиэхиньикэни туһаннылар.
Маннык ссылканан көрүҥ: http://tv.rbc.ru/archive/chez/5d407e112ae5966766429b9a
Саха Өрөспүүбүлүкэтин Ил Дарханын уонна Саха Өрөспүүбүлүкэтин бырабыыталыстыбатын пресс-сулууспата.