Айсен Николаев фашизмы утарар норуоттар икки ардыларынааҕы конгресска кытынна
Ил Дархан Айсен Николаев бэҕэһээ, атырдьах ыйын 20 күнүгэр, «Аармыйа-2022» диэн форум чэрчитинэн ыытыллыбыт норуоттар икки ардыларынааҕы фашизмы утарар I конгресска кытынна.
Конгресс сүрүн сыалынан аан дойду үрдүнэн нацизм уонна неонанизм идеологияларын утары охсуһууга аан дойду таһымнаах уопсастыбалар күүстэрин, кыахтарын түмүү буолар. Айсен Николаев форумҥа Арассыыйаны утары ыытыллар информационнай сэриини утары туруулаһар инниттэн, бастакы уочаратынан, сымыйа өйдөбүллэртэн, быһаарыылартан, идиэйэлэртэн кэлэр кэнчээри ыччаты араҥаччылыахтаахпытын уонна үрдүк таһымнаах сиэр-майгы баар буоларын ситиһиэхтээхпит диэн эттэ.
«Байыаннай эпэрээссийэттэн итэҕэһэ суох ыарахан соруктар бааллар. Олортон биирдэстэрэ — өстөөхтөр дьон, бастакы уочарат, ыччаппыт өйүн сүүйүө суохтаахтарын туруулаһыахтаахпыт. Биһигини утары бары өттүнэн олус кырыктаах информационнай сэрии ыытылла турарын өйдүөх тустаахпыт. Онон бүгүҥҥү күҥҥэ оҕолорбутун патриотизм тыыныгар иитэрбит улахан суолталаах. Саамай сүрүнэ, билигин бары-барыта түргэнник уларыйар кэмигэр, ыччаппыт бары өттүнэн сөптөөх уонна тулхадыйбат хайысханы тутуһалларын ыйыахтаахпыт. Амарах, сайаҕас санаалаах, кырдьыктаах, чиэһинэй уонна бэйэ-бэйэҕэ убаастабыллаахтык сыһыаннаһыыны өрө тутуохтаахпыт», – диэн Айсен Сергеевич бары өттүнэн олус сөптөөх санааны эттэ. Итини тэҥэ, кини Саха сиригэр патриотизм тыынын үөрэтиигэ уонна Аҕа дойду Улуу сэриитигар Кыайыы туһунан өйдөбүлү араҥаччылааһыҥҥа сөптөөх болҕомто уурулларын туһунан сиһилии кэпсээтэ.
«Биһиги ыччаппытын фашистскай идиэйэлэртэн көмүскүөхтээхпит, күөмчүлүөхтээхпит. Ол туһугар биһиги фашизмы кыайбыт дьоруойдарбыт туһунан үтүө өйдөбүлү өрө тутуохтаахпыт, ону ыччаппытыгар кэпсэтиэхтээхпит», – диэн Айсен Николаев эттэ.
«Аармыйа-2022» диэн Арассыыйа таһымнаах байыаннай-тэхэньиичэскэй форум ахсыс төгүлүн атырдьах ыйын 15-21 күннэригэр ыытыллар. Тэрээһиҥҥэ 129 дойдуттан анал дэлэгээссийэлэр ыҥырыллыбыттар. Кинилэр ортолоругар Беларуссия, Индия, Казахстан, Пакистан уонна Узбекистан дойдулара бааллар.