Айсен Николаев эрэгийиэн экэниэмикэтигэр билим көдьүүһүн туһунан кэпсэттэ
СӨ Ил Дархана Айсен Николаев Саха сирин Билимин академиятын бэрэсидьиэнин эбээһинэһин толорооччу Леонид Владимировы кытта көрсүһүү кэмигэр өрөспүүбүлүкэ социальнай-экэнэмиическэй сайдыытын билим өттүнэн арыаллааһын кэскилин уонна экэниэмикэ реальнай секторыгар билим холбоһуутун туһунан кэпсэттилэр. Бу үлэҕэ сүрүнүнэн өрөспүүбүлүкэ Сахалин уонна Магадан уобаластарын, Чукотка АУо уонна Камчатка кыраайа курдук Уһук Илин уокурук эрэгийиэннэрин кытта бииргэ тэрийбит “Север” билим-үөрэх киинэ буолуохтаах.
Айсен Николаев билим уонна бырамыысыланнай тэрилтэлэр итиэннэ былаас ыкса ситимнээхтик үлэлэһиилэрэ өрөспүүбүлүкэ социальнай-экэнэмиическэй сайдыытыгар булгуччулаах усулуобуйанан буоларыгар эрэллээҕин эттэ. Саха сирин учуонайдарын тымныыны үөрэтиигэ, ирбэт тоҥҥо, сиртэн хостонор баайга уонна ону оҥорууга, тыа хаһаайыстыбатыгар уо.д.а. салааларга оҥоруулара экэниэмикэҕэ киэҥник туһаныллыахтаах. Ону тэҥэ, көрсүһүүгэ өрөспүүбүлүкэ Билимҥэ академиятын хамнаһын уонна сэлии түмэлин олохтооһун боппуруостарын көрдүлэр. Санатан эттэххэ, 2022 сыл от ыйын 22 күнүгэр СӨ Ил Дархана Айсен Николаев РНА чилиэн-кэрэспэдьиэнэ, биология билимин дуоктара Леонид Владимировы Саха сирин Билимин академиятын бэрэсидьиэнин эбээһинэһин толорооччунан аныырын туһунан ыйаахха илии баттаабыта.
СӨ Ил Дарханын уонна СӨ Бырабыыталыстыбатын пресс-сулууспата.