Айсен Николаев Үөһээ Бүлүү оройуонугар социальнай эбийиэктэри тутууну хонтуруоллаата

Айсен Николаев Үөһээ Бүлүү оройуонугар социальнай эбийиэктэри тутууну хонтуруоллаата.

Үөһээ Бүлүү улууһугар оробуочай сырыытын кэмигэр өрөспүүбүлүкэ баһылыга Айсен Николаев хас да нэһилиэккэ социальнай эбийиэктэри көрдө. Үөһээ Бүлүүгэ Саха сирин баһылыга компьютернай томограф атыылаһалларыгар көмөлөһөрүгэр көрдөспүт оройуон киин балыыһатын үлэһиттэрин кытта көрүстэ. Тэрили туруорар дьиэ былырыын тутуллубут, ол эрээри санитарнай-эпидемиологическай ирдэбиллэргэ сөп түбэһэр курдук ситэриллиэхтээх. Томограбы “Медхамыыһыйаны ааһыы кэнниттэн Саха Өрөспүүбүлүкэтин доруобуйатын харыстабылын сайыннарыы” судаарыстыбаннай бырагыраама чэрчитинэн атыылаһыахтара.
Айсен Николаев Үөһээ Бүлүүтээҕи естественнэй-научнай хайысхалаах 2 №-дээх орто оскуола саҥа куорпуһун тутуу былаанын кытта билистэ. Манна 300-тэн тахса оҕо үөрэнэр. Бүгүн үөрэх түөрт куорпуһунан ыытыллар – 2002 таас куорпуска (2002 с.), мастарыскыайга (2013 с.), ону тэҥэ сэбиэскэй кэмҥэ тутуллубут кыра мас куорпуска уонна спортивнай саалаҕа сырытта.

Кини маны сэргэ өрөспүүбүлүкэтээҕи гимназия 100 миэстэлээх интэринээт тутуутун хаамыытын билистэ. Үлэ 2016 сыллаахха саҕаланан баран, үбүлээһинтэн сылтаан тохтотуллубут. Тутууну былырыыҥҥыттан сөргүппүттэр. “Строймонтаж – 2002” хампаанньа быйылгы үөрэх дьыла саҕаланыытыгар эбийиэги туттарарга эрэннэрдэ.
Хоро сэлиэнньэтигэр Николаев 75 миэстэлээх тутулла турар дьааһыла-дьыссаакка сырытта. Тамалакааҥҥа 45 миэстэлээх дьыссаат уонна 100 миэстэлээх кыра кэмпилиэктээх оскуола кыттыгас дьиэлэрин бырайыагын көрдө.
“Биһиги бу бырайыакка болҕомтобутун туһаайабыт. Табылыннаҕына, маннык дьиэлэри 500-600 киһи олорор сэлиэнньэлэригэр туһаныахпыт. Бу экэниэмикэ өттүнэн сөптөөх быһаарыныы”, — диэтэ Николаев.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.