Култуура Маны аах

Ил Дархан Олоҥхо ыһыаҕар бэлэмнэнии үлэтигэр үрдүк сыанабылы биэрдэ

Бүгүн, тохсунньу 22 күнүгэр, СӨ Ил Дархана Айсен Николаев Үөһээ Бүлүү улууһугар үлэлиир. Кини Олоҥхо ыһыаҕын тэрийэр  хамыыһыйатын кытары көрүстэ.

«Олоҥхо ыһыаҕа быйыл өрөспүүбүлүкэ биир уһулуччу суолталаах бэлиэ даататыгар — Саха АССР 100 сылыгар уонна Арассыыйа норуоттарын култуурунай нэһилиэстибэлэрин сылыгар ыытылларынан, ураты үрдүк таһымнаахтык тэриллиэхтээх. Бу улахан эппиэтинэстээх тэрээһиҥҥэ бэлэмнэнии 2020 сылтан былааннаахтык ыытыллыбыта үөрдэр. Улахан үлэ оҥоһулунна, тутууну ситэрии-хоторуу уонна эбийиэктэри өрөмүөннээһин салҕанар. Билигин саамай сүрүнэ, бары бэлиэтэммит тэрээһиннэри олоххо киллэрэргэ үлэ тиһэҕэр диэри ымпыктаан-чымпыктаан оҥоһуллуохтаах«, — диэн  Ил Дархан сүбэ мунньах кыттыылаахтарыгар  туһаайан эттэ.
15-с төгүлүн ыытыллар Олоҥхо ыһыаҕа быйыл бэс ыйын 20-21 күннэригэр Үөһээ Бүлүүгэ буолуохтаах. Саамай сүрүнүнэн манна үгэс буолбут IV төгүлүн норуоттар икки ардыларынааҕы бэстибээл, ЮНЕСКО шедеврдэрин көрсүһүүтэ буолуоҕа.
Ыһыах киэҥ түһүлгэтин култуурунай бырагырааматыгар Олоҥхо, саха, үҥкүү, эдэр көрөөччү, Хотугу аҕыйах ахсааннаах норуоттар тыйаатырдарын талба талааннаах артыыстара кыттыыны ылыахтара. Сүрүн режиссер Руслан Тараховскай.
Бэлэмнэнии иитинэн эрэгийиэнтэн уонна олохтоох бүддьүөттэн үбүлээһин боппуруоһа быһаарыллыбыт, сүрүн тэрийэр үлэлэр ыытыллаллар.
Олоҥхо ыһыаҕар улахан тутуулар 2020 сылтан саҕаламмыттара — 2200 миэстэлээх тырыбыналаах түһүлгэ, кымыс иһэр киин, «Аал Луук мас» ытык мас, күнү көрсөр сир, Аар-Баҕах сэргэ, Өрөспүүбүлүкэ аллеята тутуллаллар. Өрөспүүбүлүкэтээҕи үтүө дьыала хамсааһынынан, хас да тутууну быйыл ыам ыйа бүтүөр диэри түмүктүүр былааннаахтар.
Ил Дархаҥҥа ипподрому өрөмүөннээһин саҕаламмытын иһитиннэрдилэр. Манна эмиэ биир сүрүн, болҕомтону тардар тэрээһин, үгэс буолбут ат сүүрдүүтэ ыытыллыахтаах. Инфраструктура эмиэ тупсарыллар, тэрийэр кэмитиэт Үөһээ Бүлүү уонна Андреевскай сэлиэнньэлэригэр массыына суолун аспааллыыры, ыһыах ыытыллар сиригэр киирэр суолу оҥорууну хонтуруоллуур. Маны таһынан, Куорамыкы биэрэгин, култуура уонна сынньалаҥ пааркатын, Үөһээ бүлүүгэ оҕо былаһааккатын тупсарыы үлэлэрэ болдьоҕор түмүктэниэхтэрэ.
Андрей Сорокин (СИА) хаартыскаҕа түһэриитэ
0
0
Telegram @edersaas20