Ил Дархан э.т. Айсен Николаев бүгүн Үөһээ Бүлүү оройуонугар ыһыахха сырытта. Ыһыах судаарыстыбаннай деятель Исидор Барахов төрөөбүтэ 120 сылыгар ананна. Оройуон актыбыыстарын кытта көрүстэ уонна оскуоланы бүтэрээччилэргэ кыһыл көмүс мэтээллэри туттартаата. Ону таһынан, Айсен Сергеевич бэйэтэ бүтэрбит оскуолатыгар — Михаил Алексеев аатынан өрөспүүбүлүкэтээҕи лицей-интэринээккэ сырытта.
Күн иккис аҥаарыгар Ил дархан э.т. нэһилиэнньэни кытта көрсөн бүддьүөт бэлиитикэтин, ороскуоту кыччатыы, улуус социальнай сайдыытын туһунан кэпсэттэ.
Санатан эттэххэ, Айсен Николаев бэс ыйын 25 күнүгэр Үөһээ Бүлүү уонна Мирнэй оройуоннарыгар командировкаҕа сылдьар. Үс күн устата дьону кытта көрсүөҕэ, социальнай уонна промышленнай объектары көрүөҕэ. Итиэннэ «АЛРОСА» АХ акицонердарын сыллааҕы уопсай мунньахтарыгар кыттыаҕа.
Николай Попов, «Саха сирэ» хаһыат, edersaas.ru