Ил Дархан Айсен Николаев бүгүн Эдьигээн улууһун баһылыга Алексей Мандаровы кытта көрүстэ. Улуус баһылыга эпидемиологическай балаһыанньа туругун, социальнай эбийиэктэри уонна саахалланар итиэннэ эргэрбит дьиэлэри көһөрүү бырагырааматынан олорор дьиэлэри тутуу, улуус социальнай-экэнэмиическэй сайдыытын боппуруостарын туһунан сиһилии кэпсээтэ.
Алексей Мандаров улууска эпидемиологическай балаһыанньа биир таһымҥа турарын иһитиннэрэр. Түгэнинэн туһанан, хамсык тарҕаныытын бохсууга көмөлөрүн, өйөбүллэрин иһин эрэгийиэн, бырабыыталыстыба уонна өрөспүүбүлүкэтээҕи суһал штаб салалтатыгар олохтоохтор ааттарыттан махталын биллэрдэ.
Улуус дьаһалтатын сүрүн үлэтин билиһиннэрэригэр Алексей Мандаров болҕомтону социальнай эбийиэктэри, олорор дьиэлэри уонна олох-дьаһах хомунаалынай хаһаайыстыба эбийиэктэрин саҥардыы боппуруостарыгар уурда.
“Эһиил биһиги улууспутугар социальнай инфраструктура хас даҕаны эбийиэгэ үлэҕэ киириэхтээх. Күн бүгүн Кыстатыам сэлиэнньэтигэр 60/30 миэстэлээх оскуола-уһуйаан, Эдьигэээн сэлиэнньэтигэр Култуура дьиэтэ уонна саахалланар, эргэрбит дьиэ олохтоохторугар 49 кыбартыыралаах олорор дьиэ тутулла турар. Элбэх кыбартыыралаах таас дьиэ эһиил күһүн үлэҕэ киириэҕэ, онно 12-лии кыбартыыралаах саахалланар туруктаах түөрт дьиэ олохтоохторо олоруохтара. 2024 сылга диэри “2019-2025 сылларга саахалланар уонна эргэрбит дьиэттэн дьону көһөрүү” өрөспүүбүлүкэтээҕи аадырыстаах бырагырааманан 35 дьиэни көтүрэн, 15 таас, саҥа элбэх кыбартыыралаах дьиэни былаанныыбыт. Үлэ көхтөөхтүк барар, онон аадырыстаах бырагыраама туоларыгар эрэлбит улахан”, — диэн улуус баһылыга кэпсээтэ.
Итини сэргэ Бэстээх сэлиэнньэтигэр квартальнай хочуолунай, Эдьигээн аэропордун балаһатын уларытан оҥоруу үлэтин быһаарыстылар.
“Эдьигээн олохтоохторо улуус киинигэр уонна нэһилиэктэргэ барар үтүө уларыйыылартан үөрэллэр. Көмө уонна өйөбүл иһин эрэгийиэн салалтатыгар, бырабыыталыстыбатыгар махтаналлар”, — диэн Алексей Мандаров бэлиэтээтэ.
Ил Дархан Айсен Николаев үтүө өттүгэр уларыйыы баарын нэһилиэнньэ чахчы билэрин туһугар, Эдьигээн улууһун социальнай-экэнэмиичэскэй сайдыытын иитинэн барар сорук барыта, хаачыстыбалаахтык уонна кэмигэр олоххо киирэригэр эрэнэрин биллэрдэ.
СӨ Ил Дарханын уонна Бырабыыталыстыбатын пресс-сулууспата.
Андрей СОРОКИН (СИА) хаартыскаҕа түһэриилэрэ.