Айсен Николаев: дв2025 саайтка киирэр этиилэр федеральнай былаастан Уһук Илин  олохтоохторо тугу кэтэһэллэрин көрдөрөллөр

Уһук Илин олохтоохторо федеральнай былаастан тугу кэтэһэллэрин дв2025 саайтыгар киирэр этиилэр көрдөрөллөр, диэн Саха сирин баһылыга Айсен Николаев “Якутия24” ханаалга биэрбит интервьютугар эттэ.

Билиҥҥи туругунан Саха сирин олохтоохторуттан Уһук Илини сайыннарыыга 2667 этии киирдэ. Бу Уһук Илин федеральнай уокурукка саамай улахан көрдөрүү.

“Биһиги этиилэрбит, ханнык эрэ сайаапкаҕа куоласпыт ахсаана Уһук Илин бырагырааматыгар ханнык бырайыагы киллэрэр туһунан дьүүллэһии кэмигэр сүрүн усулуобуйанан буолуоҕа. Бэйэбит этиилэрбитинэн федеральнай былаастан тугу туруорсарбытын көрдөрөбүт. Тоҕо диэтэххэ, манна олорор дьон бэйэбит региоммут кыһалҕатын кимнээҕэр да ордук билэбит”, — диэтэ Айсен Николаев. Кини Саха сирин олохтоохторо уонна Уһук Илин бары олохтоохторо цифровой эйгэ көмөтүнэн бэйэлэрин баҕа санааларын тиэрдиэхтээхтэрин бэлиэтээтэ.

“Холобур, Өлүөнэ муостата Саха сирин салалтатыгар эрэ буолбакка, нэһилиэнньэбитигэр бүттүүнүгэр бастакы нүөмэрдээх кыһалҕа буоларын көрөбүт. Өрөспүүбүлүкэ олохтоохторо бэйэлэрин көрдөһүүлэригэр бу туһунан этэллэр. Дьон санаата – муостаны национальнай бырагыраамаҕа киллэрэргэ үтүө түмүгү ситиһэргэ дьоһун усулуобуйа”, — диэн дойду бөдөҥ регионун баһылыга бэлиэтээтэ.

Санатан эттэххэ, Айсен Николаев Уһук Илин губернатордарыттан бастакынан вице-премьер, Арассыыйа Бэрэсидьиэнин Уһук Илин федеральнай уокуругар боломуочуйалаах бэрэстэбиитэлэ Юрий Трутнев стратегическай докумуону ылыныыга олохтоохтору, эспиэрдэри уонна учуонайдары кытыннарар туһунан көҕүлээһинин өйөөбүтэ. Саха сирэ уокурук атын субъектарынааҕар урутаан “Мин идеям –Уһук Илиҥҥэ” бырайыак чэрчитинэн өрөспүүбүлүкэ Уопсастыбаннай палаататын көҕүлээһининэн  этиилэри хомуйууну саҕалаабыта.

Уһук Илини 2025 сылга диэри сайыннарыыга уонна 2035 сылга диэри сайдар кэскилигэр туһуламмыт национальнай бырагырааманы оҥорорго Арассыыйа Бэрэсидьиэнэ Владимир Путин сорудахтаабыта. Докумуону Владивостокка балаҕан ыйын 4-6 күннэригэр ыытыллар Илиҥҥи V экэниэмикэ форумугар билиһиннэриэхтэрэ.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата