Айсен Николаев: “Донбаас олохтоохторун махталлара улахан”

Ааптар: 
Бөлөххө киир:

Бу күннэргэ Саха сиринээҕи “Росгвардия” байыастара Украинаттан анал байыаннай эпэрээссийэттэн дьиэлэригэр төннөн кэллилэр. Кинилэри Ил Дархан Айсен Николаев уонна РФ Национальнай гвардиятын илиҥҥи уокуругун командующайа, генерал-полковник Игорь Голлоев көрүстүлэр.

Ил Дархан Айсен Николаев байыастары этэҥҥэ төрөөбүт буордарыгар эргиллэн кэлбиттэринэн эҕэрдэлээн туран, кинилэр бары хорсун быһыыны көрдөрбүттэрин, ыччакка холобур буолалларын эттэ.

— РФ бэрэсидьиэнэ, биһиги Верховнай Главно-командующайбыт Владимир Путин туруорбут соругун чиэстээхтик толорон кэллигит. Бу соруктар барыта биһиги иллээхтик-эйэлээхтик, дьоллоохтук олорорбут туһугар туруоруллубуттара. Этэҥҥэ сулууспаҕытын баран этэрээт толору састаабынан кэлбититтэн мин үөрэбин. Ити олус улахан суолталаах. Бу соторутааҕыта Донбааска балаһыанньаны миэстэтигэр баран көрөн-истэн кэлбитим. Эһиги хас биирдиигит дьоруойдаргыт. Донбаас дьоно-сэргэтэ эһигини хас биирдиигитин бэйэлэрин быыһааччыларын курдук көрөллөр уонна эһиэхэ эрэллэрэ, махталлара улахан. Саха сирин байыастара хорсуннарын, тулуурдаахтарын бу да сырыыга көрдөрдүлэр. Мин онон киэн туттабын, — диэн бэлиэтиир Айсен Сергеевич.

Санатан эттэххэ, Ил Дархан бэс ыйын 28 күнүгэр Кировскай куораты кытары бииргэ үлэлэһэргэ дуогабарга илии баттаһан кэлбитэ. Саха сирэ Кировскайы чөлүгэр түһэриигэ үлэлэһиэхтээх. Уһук Илиҥҥи федеральнай уокуруктан Донбааска сэттэ эрэгийиэн көмө-тирэх буолуоҕа. Саха сирэ Донбааска 2014 сылтан гуманитарнай көмөнү ыытар, ону таһынан босхоломмут куораттарга оҕо былаһааккатын тутан биэрбитэ, балыыһаларга анал тэриллэри ылбыта.

 Биһиги Донецкай Народнай Өрөспүүбүлүкэ Кировскай куоратын кытары бииргэ үлэлэһэргэ дуогабар түһэрсэн кэллибит, куораты чөлүгэр түһэриигэ көмөлөһүөхпүт. Аҕыс сыл устата Донбаас дьоно-сэргэтэ ытыалаһыыга олордо, куораттар урусхалланнылар, олохтоохтор онтон олус сылайдылар, илиһиннилэр. Саха киһитин сиэринэн биһиги мантан хайдах да туора турар кыахпыт суох, төһө кыайарбытынан көмөлөһүөхпүт. Маннык кэмҥэ бары биир сомоҕо буоларбыт хаһааҥҥытааҕар да наада. Саха сирин байыастара дьиҥнээх хорсун быһыыны көрдөрдүгүт, кинилэргэ эрэл кыымын сахтыгыт. Билигин барыбыт күүһүнэн бу икки өрөспүүбүлүкэлэр иккис тыыннарын ылыахтара, — диэн иһитиннэрдэ көрсүһүү кэмигэр.

Генерал-полковник Игорь Голлоев көрсүһүүгэ байыастар чугас дьонноругар, дьиэ кэргэттэригэр махтал тылларын эттэ.

 Аҕа дойду сэриитигэр, 77 сыл анараа өттүгэр, биһиги аҕаларбыт, эһэлэрбит өстөөхтөрү утары саа-саадах тутан, төрөөбүт дойдуларын көмүскээбиттэрэ. Билигин биһиги уолаттарбыт аҕа дойдуларын, ийэ буордарын көмүскээн кэллилэр. Бу буолар төрөөбүт дойдуга ытык иэһи толоруу диэн. Эһиги хас биирдиигит Донецкай уонна Луганскай Народнай Өрөспүүбүлүкэлэр олохтоохторугар, кэлэр кэнчээри ыччаттарыгар суолу астыгыт. Мин бүгүн сүһүөхтээх бэйэм сүгүрүйэн туран эһиги ийэлэргитигэр, аҕаларгытыгар, дьиэ кэргэттэргитигэр махтал тылларын этиэхпин баҕарабын. Кинилэр эрэллэрэ, тапталлара эһигини куруутун арыаллыы сырыттын, — диэн этэр кини.

Аграфена Кузьмина, «Саха сирэ» хаһыат

+1
0
+1
0
+1
0
+1
0
+1
0
+1
0
+1
0