Айсен Николаев: дьон туруктаах буолуутун ситиһии – инники күөҥҥэ тутар боппуруоспут
Ил Дархан Айсен Николаев бүгүн иһитиннэрбитинэн, өрөспүүбүлүкэ экэниэмикэтэ туруктаах буолуутугар барыта 10,5 млрд солкуобай кээмэйдээх көмө барыаҕа.
– Билиҥҥи туругунан эттэхпинэ, экэниэмикэ туруктаах буолуутугар көмө быһыытынан барар суумабыт 10,5 млрд солкуобайга тэҥнэстэ. Ол иһигэр 2,5 млрд солкуобай дьоҕус бизнескэ нолуоктарыгар көмө быһыытынан, 2 млрд солкуобай – таһаҕаһы таһыыга, 5 млрд солкуобай – тыа хаһаайыстыбатыгар, сайдыы институттарыгар, тэрилтэлэргэ чэпчэтиилээх кирэдьиити биэриигэ, айти технологиянан дьарыктанар хампаанньаларбытыгар, быраамыысыланнаска, салгын тырааныспарыгар барыаҕа, – диэн этэр Айсен Сергеевич.
Ону сэргэ бүддьүөт сорох үлэһиттэригэр хамнаһы үрдэтии муус устартан саҕаланыаҕа. Былаан быһыытынан, хамнаһы үрдэтиигэ киирбэккэ хаалбыт бүддьүөт үлэһиттэригэр эбии төлөбүр алтынньыга барыахтаах этэ. Ити миэрэ нэһилиэнньэ дохуота кыччаабатын хааччыйыахтаах.
Санатан эттэххэ, кулун тутар 16 күнүгэр РФ бэрэсидьиэнэ Владимир Путин бырабыыталыстыба чилиэннэрин, эрэгийиэн салайааччыларын кытары Арассыыйа субъектарын экэниэмикэлэрэ туруктаах, дьон-сэргэ дохуоттаах буолуутугар улахан мунньах ыыппыта уонна туһааннаах ыйаахха илии баттаабыта. Мунньахха Владимир Владимирович дьон-сэргэ хамнастаах, үлэлээх буолуутугар, нэһилиэнньэ аһынан-үөлүнэн хааччыллыытыгар, о.д.а. сытыы боппуруостарга болҕомтону ордук уурарга эппитэ.
– Бу күннэргэ таһаҕас таһыытыгар, сыананы хонтуруоллааһыҥҥа, салгын суолунан сылдьыыга, аһынан-үөлүнэн хааччыллыыга мунньахтары ыыттыбыт. Билигин өрөспүүбүлүкэ аһынан-үөлүнэн толору хааччыллан олорор. Урукку өттүгэр түөрт ыйга суоттанан аһы-үөлү аҕалар буоллахпытына, билигин эбии харчы көрөн, бу сыл бүтүөр диэри нэһилиэнньэ сөптөөх аһынан-үөлүнэн хааччыллыаҕа, ол иһигэр бурдугунан, саахарынан. Онон ас-үөл суох буолуоҕа диэн долгуйар наадата суох, – диэн бэлиэтиир кини.
Аан дойду үрдүнэн тахсыбыт балаһыанньаҕа дьиэ-уот тутуута хайдах буолоуҕай? Манна хоруйдаан Ил Дархан: “Хааччахтар кэмнэригэр дьиэ-уот тутуутун кыччатыа суохтаахпыт, бу туһунан бэрэсидьиэн Владимир Путин да эттэ. Нэһилиэнньэ дьиэнэн-уотунан хааччыллыытыгар бары миэрэлэр ылыллыахтара”, – диэн эттэ.
Билигин сыана үрдүү турар кэмигэр ордук суола-ииһэ суох киин сиртэн ыраах сытар нэһилиэнньэлээх пууннар, хотугу улуустар долгуйаллар.
– Хотугу улуустарга, суола-ииһэ суох нэһилиэнньэлээх пууннарбытыгар ураты болҕомтобутун уурабыт. «Якутоптторг» нөҥүө бурдугу, саахары, о.д.а. табаары тиэрдиигэ сөптөөх үп-харчы көрүлүннэ. Атыыга-тутууга былырыыҥҥыттан саҕалаабыт логистическай кииммитин салгыы сайыннарарга үлэлиибит. Сүрүн сыалбыт-сорукпут диэн хотугу улуустарга сыана таһыма атын куораттар курдук буолуохтааҕын ситиһии, – диэн бэлиэтиир Айсен Сергеевич.
Аграфена КУЗЬМИНА