Ил Дархан Айсен Николаев Дьокуускайга икки саҥа тутууга сырытта.
Бэҕэһээ, от ыйын 4 күнүгэр, Ил Дархан Айсен Николаев Дьокуускайга Ю.А.Гагарин аатынан култуура уонна ускуустуба Киинин уонна Норуоттар икки ардыларынааҕы Арктика оскуолатын тутууларын көрдө. Маны сэргэ, Курашов уонна Поярков уулуссаларын быһа охсуһууларыгар итиэннэ куорат таһынааҕы бөһүөлэккэ Новай уулуссаҕа ыытыллар үлэлэри көрдө.
Ю.А.Гагарин аатынан култуура уонна ускуустуба Киинэ былаан быһыытынан, Космонавтика күнүгэр — муус устар 12-гэр арыллыахтааҕын, коронавирус дьаҥа мэһэйдээбитэ. Манна даҕатан эттэххэ, утуу судаарыстыба уонна чааһынай бииргэ үлэлээһин бырайыагынан 2015 сыллаахтан үлэтин саҕалаабыт. Билигин, кэлэктиип тэрилтэни арыйарга көҥүл ылары күүтэр. Манна СӨ авиациятыгар аналлаах мусуой тэриллэрэ былааннанар. Ил Дархаҥҥа аныгы тэрилинэн хааччыллыбыт 500 киһи олорор саалатын көрдөрдүлэр. Улахан уораҕайга нэһилиэнньэни киэҥник хабар, үлэни-хамнаһы далааһынныыр сорук турар.
«Олус үчүгэй эбийиэк. Дизайнынан, интерьеринэн, тупсаран, киэргэтэн оҥоһуутунан, аныгы аппаратууранан хааччыллыытынан, мин көрдөхпүнэ, өрөспүүбүлүкэҕэ бастыҥ Киин«, — диэтэ Айсен Николаев. Дьокуускай култуурунай-сырдатар олоҕо өссө сайдарыгар уонна ураты, сонун сүүрээнинэн болҕомтону тардар Киин буоларыгар эрэнэрин биллэрдэ.
Норуоттар икки ардыларынааҕы Арктика оскуолатыгар тутуу түмүктэнэн, билигин тэрилин ситэрэн-хоторон биэрии ыытылла турар. Тэхиниичэскэй хааччыллыытынан өрөспүүбүлүкэҕэ, Уһук Илиҥҥэ ордуктарынан буолар. Манна үөрэххэ оҕолору ыҥыран, сайабылыанньалары ылыы саҕаламмыт. Ил Дархан төрөппүттэр болҕомтолорун уураллара наадатын эттэ.
Салгыы Курашов уонна Поярков быһа охсуһууларыгар өрөмүөнү, Новай уулуссаҕа аспааллааһыны көрдө. Айсен Николаев куорат таһыгар суолу оҥоруу үлэтин тэтимэ сөптөөхтүк баран иһэрин, сорохторго кыраапыгы куота баран иннигэр түһүү кытары баарын эттэ. Оттон Дьокуускай иһигэр сорох уулуссаларга өрөмүөҥҥэ кыраапыктан хаалыы баарын ыйда.
«Былырыын аспаалы хаарга уурбуттара хатыламматын курдук, кыраапыктан хаалыыны чугастааҕы кэмнэргэ ситиһиннэрэргэ, суолга үлэни болдьоҕор бүтэрэргэ чопчу соруктар туруорулуннулар. Бу уулуссаларга аспаал, тротуар боппуруостарыгар элбэх сэмэ оҥоһуллар. Бу суоллары ирдэбилгэ эппиэттиир гына оҥоруохха наада«, — диэтэ Ил Дархан.
СӨ Ил Дархан уонна Бырабыыталыстыба пресс-сулууспата
